ഇപിഎഫ്: എക്സിറ്റ് തീയതി അപ്‌ഡേറ്റ് ചെയ്യാൻ ഇനി തൊഴിലുടമയെ ആശ്രയിക്കേണ്ട

എപ്ലോയീസ് പ്രൊവിഡന്റ് ഫണ്ട് ഓർഗനൈസേഷന്റെ (ഇപിഎഫ്ഒ‌) പോർട്ടൽ വഴി ഇനി ഓൺലൈനായി നിങ്ങളുടെ എക്സിറ്റ് തീയതിയും അപ്‌ഡേറ്റ് ചെയ്യാൻ കഴിയും. ട്വീറ്റിലൂടെയാണ് വരിക്കാർക്കുള്ള ഈ സന്തോഷവാർത്ത ഓർഗനൈസേഷൻ അറിയിച്ചത്. നിലവിലെ ജോലിയിൽ നിന്നും പുതിയതിലേക്ക് മാറുന്നവർക്കാണ് ഇത് പ്രയോജനപ്പെടുക. മുൻപ് ഈ സൗകര്യം ഓൺ‌ലൈനിൽ ലഭ്യമല്ലാത്തതിനാൽ എക്‌സിറ്റ് തീയതി നൽകാൻ ജീവനക്കാർക്ക് അവരുടെ മുൻ തൊഴിലുടമയെ ആശ്രയിക്കേണ്ടിയിരുന്നു. ഇതിനാണ് ഇപ്പോൾ മാറ്റം വരാനിരിക്കുന്നത്. ക്ലെയിം സമർപ്പിക്കാനും, ട്രാൻസ്‌ഫർ ചെയ്യാനും, സെറ്റിൽമെന്റുകൾക്കും എക്സിറ്റ് തീയതി പ്രധാനമാണ്. കാരണം തീയതി കൃത്യമായി അപ്‌ഡേറ്റ് ചെയ്‌തില്ലെങ്കിൽ, നിങ്ങളുടെ തൊഴിൽ തുടർച്ചയായി കണക്കാക്കില്ല. അത്തരം സാഹചര്യങ്ങളിൽ ഇടക്കാലത്ത് നിങ്ങൾക്ക് ലഭിച്ച പലിശയ്‌ക്ക് നികുതി അടയ്‌ക്കേണ്ടതായും വരാം.

ഇപിഎഫ്ഒ പോർട്ടൽ വഴി ഓൺലൈനായി എക്സിറ്റ് തീയതി എങ്ങനെ അപ്ഡേറ്റ് ചെയ്യാം?

1. നിങ്ങളുടെ യു‌എ‌എൻ‌ (യൂണിവേഴ്സൽ‌ അക്കൗണ്ട് നമ്പർ‌), പാസ്‌വേഡ് എന്നിവ ഉപയോഗിച്ച് ഇപി‌എഫ്‌ഒ പോർട്ടലിലേക്ക് പ്രവേശിക്കുക.

2. അതിനുശേഷം 'മാനേജ്' എന്ന വിഭാഗത്തിന് ചുവടെ 'മാർക്ക് എക്സിറ്റ്' എന്നത് ക്ലിക്കുചെയ്യുക.

3. 'സെലക്‌റ്റ് എപ്ലോയിമെന്റ്' എന്ന മെനുവിൽ നിങ്ങളുടെ പിഎഫ് നമ്പർ തിരഞ്ഞെടുക്കുക.

4. എക്‌സിറ്റ് തീയതിയും കാരണവും പൂരിപ്പിക്കുക.

5. തീയതി അപ്‌ഡേറ്റ് ചെയ്യുന്നതിന് നിങ്ങളുടെ രജിസ്റ്റർ ചെയ്‌ത നമ്പറിലേക്ക് ഒടിപി ലഭിക്കുന്നതാണ്.

6. ഈ ഒടിപി നൽകിക്കഴിഞ്ഞാൽ നിങ്ങളുടെ മൊബൈൽ നമ്പറിൽ ഒരു സ്ഥിരീകരണ സന്ദേശം ലഭിക്കും.