ഇ-ഗവേണൻസ് മൊബൈൽ ആപ്പ് ഉപയോഗിച്ച് നിങ്ങളുടെ പിഎഫ് എങ്ങനെ പിൻവലിക്കാം?

നിങ്ങളുടെ പ്രൊവിഡന്റ് ഫണ്ട് തുക പിൻവലിക്കാൻ ആഗ്രഹിക്കുന്നുണ്ടെങ്കിൽ ഇപ്പോൾ എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ) തേടി പോവേണ്ട ആവശ്യമില്ല. സാങ്കേതികവിദ്യ വളർന്നതോടെ ഒരു സ്‌മാർട്ട് ഫോൺ ഉണ്ടെങ്കിൽ നിങ്ങളുടെ പിഎഫ് അക്കൗണ്ട് പരിശോധിക്കുന്നതും ബാലന്‍സ് അടക്കമുള്ള വിവരങ്ങള്‍ അറിയുന്നതും പിഎഫ് തുക പിൻവലിക്കുന്നതും അനായാസമായി മാറിയിരിക്കുന്നു. ഉമാംഗ് ആപ്പ് വഴി നിങ്ങൾക്കിത് സാധ്യമാകും.

സര്‍ക്കാരിന്റെ വിവിധ ആപ്പുകളും സേവനങ്ങളും ഉപയോഗിക്കുന്നതിനായി കേന്ദ്രസര്‍ക്കാര്‍ പുറത്തിറക്കിയ ആപ്പാണ് ഉമാംഗ്. ഉമാംഗ് ആപ്പ് വഴി ഇതിനായി ഫോണും ഒടിപിയും ഉപയോഗിച്ച്‌ ഒറ്റത്തവണ രജിസ്റ്റര്‍ ചെയ്യേണ്ട ആവശ്യമേ ഉള്ളു. ഇപിഎഫ്ഒ-യില്‍ പന്ത്രണ്ട് അക്ക യുഎഎൻ (യൂണിവേഴ്സൽ അക്കൗണ്ട് നമ്പർ) രജിസ്റ്റര്‍ ചെയ്തിട്ടുള്ളവര്‍ക്ക് മാത്രമേ ഈ സൗകര്യം ലഭിക്കുകയുള്ളൂ. ഇപിഎഫ്ഒ വെബ്സൈറ്റിലൂടെ നിങ്ങൾക്ക് യുഎഎൻ ആക്ടിവേറ്റ് ചെയ്യാൻ സാധിക്കും.

എങ്ങനെയാണ് പിഎഫ് പിൻവലിക്കുന്നതിന് അപേക്ഷിക്കേണ്ടത്?

1. ആദ്യം നിങ്ങളുടെ സ്‌മാർട്ട് ഫോണിലെ പ്ലേ സ്‌റ്റോറിൽ നിന്നും ഉമാംഗ് ആപ്പ് ഡൗൺലോഡ് ചെയ്യുക.

2. സെർച്ച് മെനുവിലേക്ക് പോയി ഇപിഎഫ്ഒ ​​എടുക്കുക

3. 'എംപ്ലോയി സെൻട്രിക്’ എന്നത് സെലക്‌റ്റ് ചെയ്‌ത ശേഷം 'ക്ലെയിം റൈസ്’ എന്നത് ക്ലിക്കുചെയ്‌ത് ഇപിഎഫ് യുഎഎൻ നമ്പർ നൽകുക.

4. നിങ്ങളുടെ ഫോൺ നമ്പറിലേക്ക് അയച്ച ഒടിപി നൽകി പിൻവലിക്കൽ തരം തിരഞ്ഞെടുത്ത ശേഷം ഉമാംഗ് ആപ്പ് വഴി സബ്മിറ്റ് ചെയ്യുക.

5. ഒരു ക്ലെയിം റഫറൻസ് നമ്പർ നിങ്ങൾക്ക് ലഭിക്കുന്നതാണ്. ഇത് നിങ്ങളുടെ ക്ലെയിം പരിശോധിക്കുന്നതിന് ഉപയോഗിക്കാം.