വ്യക്തികളുടെ സ്വകാര്യത കാത്തുസൂക്ഷിക്കാന്‍ സഹായിക്കുന്ന 'ക്ലിയര്‍ ഹിസ്റ്ററി' സൗകര്യവുമായി ഫേസ് ബുക്ക്. തേര്‍ഡ് പാര്‍ട്ടി അപ്ലിക്കേഷനുകളിലൂടെ ഫേസ്ബുക്ക് കലക്ട് ചെയ്ത വിവരങ്ങള്‍ ഒറ്റ ക്ലിക്കിലൂടെ ഇല്ലാതാക്കാന്‍ കഴിയുമെന്നതാണ് ഇതിന്റെ പ്രത്യേകത.

പലപ്പോഴും ഭാവിയില്‍ നിങ്ങളുടെ രൂപം എങ്ങനെയിരിക്കും? നിങ്ങള്‍ക്ക് ഏത് സെലിബ്രിറ്റിയുമായാണ് സാമ്യം? ഇത്തരത്തിലുള്ള പല അപ്ലിക്കേഷനുകളും നിങ്ങള്‍ ഉപയോഗിച്ചിട്ടുണ്ടാകും. ഇത്തരം ഫേസ് ബുക്ക് അപ്ലിക്കേഷനുകളിലൂടെ വാസ്തവത്തില്‍ നിങ്ങളുടെ വ്യക്തിഗത വിവരങ്ങളാണ് ചോര്‍ത്തുന്നത്. ഇത്തരത്തില്‍ ചോര്‍ത്തപ്പെട്ട വിവരങ്ങള്‍ ഒറ്റ ക്ലിക്കില്‍ ഇല്ലാതാക്കാനുള്ള സൗകര്യമാണ് ആഗോള സോഷ്യല്‍മീഡിയ ഭീമന്‍ ഒരുക്കുന്നത്.

എന്നാല്‍ ഈ നീക്കം പരിപൂര്‍ണമായും ഡാറ്റ സേഫാക്കുമെന്ന് കമ്പനി കരുതുന്നില്ല. കൂടാതെ ഇത്തരത്തില്‍ ഹിസ്റ്ററി ഒഴിവാക്കുന്നത് കൃത്യമായ ഓഡിയന്‍സിനെ ട്രാക്ക് ചെയ്യുന്നതില്‍ ഫേസ് ബുക്കിനും ബുദ്ധിമുട്ടുണ്ടാക്കുമെന്നാണ് കമ്പനി വൃത്തങ്ങള്‍ പറയുന്നത്. യൂസറുടെ ലൊക്കേഷന്‍, പരിഗണനകള്‍ എന്നിവ സംബന്ധിച്ച വിവരങ്ങള്‍ ഇതുകൊണ്ട് ഫേസ് ബുക്ക് പരിപൂര്‍ണമായും ഇല്ലാതാക്കാനുള്ള സാധ്യത കുറവാണ്.