ചാനലുകള്‍ കാണാന്‍ ഏതാണു ലാഭം? ഡിടിഎച്ചോ അതോ ഹോട്ട്‌സ്റ്റാര്‍ പോലുള്ള ഒടിടി ആപ്പുകളോ?

ന്യൂഡല്‍ഹി: ഡിടിഎച്ച്-കേബ്ള്‍ ടിവി സേവന ദാതാക്കള്‍ വരിക്കാരെ പിഴിയുന്നതിന് തടയിടാന്‍ ആവശ്യമുള്ള ചാനലുകള്‍ക്ക് മാത്രം പണം നല്‍കുന്ന പുതിയ രീതി ട്രായ് സ്വീകരിച്ചുവരികയാണിപ്പോള്‍. പുതിയ താരിഫ് സമ്പ്രദായം മാര്‍ച്ച് 31നകം നടപ്പില്‍ വരുത്തണമെന്നാണ് ടെലികോം അതോറിറ്റി ഓഫ് ഇന്ത്യ സേവനദാതാക്കള്‍ക്ക് നല്‍കിയിരിക്കുന്ന നിര്‍ദ്ദേശം.

എന്നാല്‍ ട്രായിയുടെ പുതിയ താരിഫ് മാനദണ്ഡങ്ങള്‍ നിലവില്‍ വന്നാല്‍ പോലും ഈ സേവനങ്ങള്‍ ലഭ്യമാക്കുന്ന ഒടിടി മൊബൈല്‍ ആപ്പുകളാണ് ഡിടിഎച്ചിനെക്കാളും കേബ്ള്‍ ടിവിയെക്കാളും ലാഭകരമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. ഹോട്ട്‌സ്റ്റാര്‍, സീഫൈവ്, സോണി ലൈവ് തുടങ്ങിയ ഓവര്‍ ദി ടോപ്പ് കണ്ടന്റ് മൊബൈല്‍ ആപ്പുകളില്‍ ഇതേ ചാനലുകള്‍ കാണാന്‍ താരതമ്യേന ചെലവ് കുറവായിരിക്കുമെന്നാണ് കണ്ടെത്തല്‍.

ഉദാഹരണത്തിന് ഹോട്ട്‌സ്റ്റാര്‍, സീഫൈവ്, സോണി ലൈവ് എന്നീ മൊബൈല്‍ ആപ്പുകളിലൂടെ 17 പ്രധാന ചാനലുകള്‍ കണുന്നതിനുള്ള വാര്‍ഷിക വരിസംഖ്യ യഥാക്രമം 999, 499, 999 രൂപ വീതമാണ്. അതായത് സ്‌പോര്‍ട്‌സ് സ്റ്റാര്‍, സ്റ്റാര്‍ വേള്‍ഡ്, എച്ച്ബിഒ, സ്റ്റാര്‍ പ്ലസ്, സീ ടിവി, സീ സിനിമ, സെറ്റ് മാക്‌സ്, പിക്‌സ് തുടങ്ങിയ 17 പ്രധാന ചാനലുകള്‍ എന്നിവ ഒടിടി വഴി കാണാന്‍ വര്‍ഷത്തില്‍ 2497 രൂപ ഒരാള്‍ക്ക് ചെലവ് വരും.

ഇനി ഈ ചാനലുകളെല്ലാം ഡിടിഎച്ച് വഴി വഴി കാണാന്‍ മാസത്തില്‍ 430.70 രൂപയാണ് സേവന ദാതാക്കള്‍ക്ക് വരിസംഖ്യയായി നല്‍കേണ്ടത്. അതായത് വര്‍ഷത്തില്‍ 5168.40 രൂപ ഇതിനായി ചെലവ് വരും. എന്നു കേബ്ള്‍ ടിവി വഴി കാണാന്‍ ചെലവ് ഇതിലും കൂടും. കാരണം തെരഞ്ഞെടുത്ത ചാനലിനുള്ള ഫീസിനു പുറമെ, നെറ്റ് വര്‍ക്ക് കപ്പാസിറ്റി ഫീ എന്ന പേരില്‍ മാസത്തില്‍ 130 രൂപ ഇവയ്ക്ക് അധികമായി നല്‍കേണ്ടിവരും. ചാനലുകളുടെ എസ്ഡി-എച്ച്ഡി സ്വഭാവത്തിന് അനുസരിച്ച് ഫീസ് കൂടുകയും ചെയ്യും.

അതായത് 17 പ്രധാന ചാനലുകള്‍ മൊബൈല്‍ ആപ്പുവഴി കാണാന്‍ മാസത്തില്‍ 235 രൂപ നല്‍കേണ്ടിവരുമ്പോള്‍ ഡിടിഎച്ച്-കേബ്ള്‍ വഴി കാണാന്‍ ചുരുങ്ങിയത് 430.70 രൂപയെങ്കിലും ചെലവാകും- ഏകദേശം ഇരട്ടിയോളം തുക. ആകെയുള്ള പ്രശ്‌നം മൊബൈല്‍ ആപ്പിന് ഡാറ്റയോ വൈഫൈയോ വേണമെന്നതാണ്. ദിവസം കഴിയുന്തോറും ഇന്റര്‍നെറ്റിനുള്ള ചെലവ് കുറഞ്ഞുവരുന്ന സാഹചര്യത്തില്‍ ഇത് വലിയൊരു പ്രശ്‌നമായി കാണേണ്ടതില്ലെന്നാണ് പൊതുവെ വിലയിരുത്തപ്പെടുന്നത്.