സാംസംഗ് ഗാലക്‌സി എസ് 10 സീരീസ് ഫോണുകള്‍ ഇന്ത്യന്‍ വിപണിയിലും; വില 55,900 മുതല്‍ 1,17,900 രൂപ വരെ

സാംസംഗിന്റെ പ്രധാന സീരീസായ ഗാലക്‌സി എസ് 10 സ്മാര്‍ട്ട് ഫോണുകള്‍ ഇന്ത്യന്‍ വിപണിയിലുമെത്തി. കഴിഞ്ഞ മാസം ആഗോള വിപണിയില്‍ അവതരിപ്പിച്ച ഗാലക്‌സി എസ്10, ഗാലക്‌സി എസ്10 പ്ലസ്, ഗാലക്‌സി എസ്10ഇ എന്നീ മൂന്ന് ഫോണ്‍ പതിപ്പുകളാണ് ഇന്ത്യന്‍ വിപണിയിലെത്തിയത്.

ഏറ്റവും വിലകുറഞ്ഞ പതിപ്പായ ഗാലക്സി എസ് 10 ഇ സ്മാര്‍ട്ഫോണിന് 55,900 രൂപയാണ് വില. ആറ് ജിബി റാം 128 ജിബി സ്റ്റോറേജ് പതിപ്പിനാണിത്. അതേസമയം ഗാലക്‌സി എസ് 10 ന്റെ എട്ട് ജിബി/128 ജിബി പതിപ്പിന് വില തുടങ്ങുന്നത് 66,900 രൂപയിലാണ്. ഇതിന്റെ എട്ട് ജിബി/512 ജിബി സ്റ്റോറേജ് പതിപ്പിന് വില 84,900 രൂപയാണ്.

ഗാലക്‌സി എസ് 10 പ്ലസ് എട്ട് ജിബി/128ജിബി പതിപ്പിന് 73,900 രൂപയും എട്ട് ജിബി/512ജിബി പതിപ്പിന് 91,900 രൂപയും 12 ജിബി/ഒരു ടിബി സ്റ്റോറേജ് പതിപ്പിന് 1,17,900 രൂപയുമാണ് വില.

ഇന്‍ഫിനിറ്റി ഓ ഡൈനാമിക്/അമോലെഡ് ഡിസ്പ്ലേ, നൂതനമായ 8 നാനോമീറ്റര്‍ എക്സിനോസ് 9820 പ്രൊസസര്‍, ഏറ്റവും പുതിയ വണ്‍ യൂസര്‍ ഇന്റര്‍ഫേയ്സ് എന്നിവ ഈ ഫോണുകളുടെ പ്രധാന സവിശേഷതകളാണ്. മികച്ച കാമറകളാണ് ഈ ഫോണുകളുടെ മറ്റൊരു പ്രധാന സവിശേഷത. ഗാലക്‌സി എസ് 10 പ്ലസ് ഫോണുകളുടെ ബാറ്ററി 4100 എംഎഎച്ചാണ്. ഗാലക്‌സി എസ് 10ന്റേത് 3400 എംഎഎച്ചും ഗാലക്സി എസ് 10 ഇയുടേത് 3100 എംഎഎച്ചുമാണ്.

മാര്‍ച്ച് 8 വെള്ളിയാഴ്ച മുതല്‍ സാംസങ്.കോം/ഇന്‍ വെബ്സൈറ്റുകളിലും, ഫ്ളിപ്കാര്‍ട്ട്, ആമസോണ്‍ ഇന്ത്യ, പേടിഎം, ടാറ്റ ക്ലിക്ക് എന്നീ ഓണ്‍ലൈന്‍ വെബ്സൈറ്റുകളിലും തിരഞ്ഞെടുത്ത ഓഫ്ലൈന്‍ കച്ചവടകേന്ദ്രങ്ങളിലും ഫോണുകള്‍ ലഭിക്കും. മാര്‍ച്ച് 31നു മുമ്പ് വാങ്ങുന്നവര്‍ക്ക് നിരവധി ഓഫറുകളും സാംസംഗ് മുന്നോട്ടുവച്ചിട്ടുണ്ട്.