നിങ്ങളുടെ അമൂല്യ വസ്തുക്കള്‍ ബാങ്ക് ലോക്കറുകളില്‍ എത്രമാത്രം സുരക്ഷിതമാണ്?

ദില്ലി: നമ്മുടെ ആഭരണങ്ങളും വിലപ്പെട്ട രേഖകളുമെല്ലാം ബാങ്ക് ലോക്കറുകളില്‍ സൂക്ഷിക്കുന്ന പതിവുണ്ട്. ലോക്കറുകളില്‍ ഇവ പൂര്‍ണ സുരക്ഷിതമാണെന്ന ധാരണയിലാണ് നാം ഇങ്ങനെ ചെയ്യുന്നത്.

കണ്ണടച്ച് വിശ്വസിക്കാമോ?

വീടുകളില്‍ സൂക്ഷിക്കുന്നതിനേക്കാള്‍ സുരക്ഷിതമാണ് ബാങ്ക് ലോക്കറുകളെന്ന് പ്രത്യേകം പറയേണ്ടതില്ല. എന്നാല്‍ ബാങ്ക് ലോക്കറുകളെ അങ്ങിനെ കണ്ണടച്ച് വിശ്വസിക്കാനാവുമോ? ഇല്ലെന്നാണ് ഉത്തരം.

കാരണം അടുത്തകാലത്തായി ഇന്ത്യയില്‍ ബാങ്ക് കൊള്ളയും മോഷണവും ക്രമാതീതമായി വര്‍ധിച്ചുവരുന്നതായാണ് കണക്കുകള്‍ വ്യക്തമാക്കുന്നത്.

 

ബാങ്കുകള്‍ക്ക് നഷ്ടമായത് 235 കോടി

കഴിഞ്ഞ അഞ്ച് വര്‍ഷത്തിനിടയില്‍ രാജ്യത്തെ ബാങ്കുകളില്‍ നിന്ന് 235 കോടി രൂപയുടെ ആഭരണങ്ങളും മറ്റും കൊള്ളചെയ്യപ്പെടുകയോ മോഷ്ടിക്കപ്പെടുകയോ ചെയ്തിട്ടുണ്ടെന്നാണ് കണക്കുകള്‍ വ്യക്തമാക്കുന്നത്. എന്നു മാത്രമല്ല, ഓരോ വര്‍ഷം കഴിയുന്തോറും ഇത്തരം സംഭവങ്ങള്‍ വലിയ തോതില്‍ വര്‍ധിച്ചുവരുന്നതായും കണക്കുകള്‍ വ്യക്തമാക്കുന്നു.

ബാങ്ക് ലോക്കര്‍ ഇന്‍ഷൂറന്‍സ്

ഇത്തരമൊരു സാഹചര്യത്തില്‍ ഏറ്റവും നല്ല വഴി, ബാങ്ക് ലോക്കറുകളില്‍ സൂക്ഷിച്ചിരിക്കുന്ന സ്വര്‍ണവും മറ്റും ഇന്‍ഷൂര്‍ ചെയ്യുകയെന്നതാണ്. അതാവുമ്പോള്‍ ഒരു ടെന്‍ഷന്റെയും ആവശ്യമില്ല. എന്തൊക്കെ സംഭവിച്ചാലും തങ്ങളുടെ സമ്പാദ്യം സുരക്ഷിതമാണെന്ന കാര്യത്തില്‍ ധൈര്യമായിട്ടിരിക്കാം. ബാങ്ക് ലോക്കറുകള്‍ സൂക്ഷിച്ചിരിക്കുന്ന ആഭരണങ്ങള്‍, മറ്റ് അമൂല്യ വസ്തുക്കള്‍ എന്നിവയ്‌ക്കൊപ്പം വിലപിടിച്ച രേഖകളും സംരക്ഷണത്തിന്റെ പരിധിയില്‍ വരുമെന്നതാണ് ബാങ്ക് ലോക്കര്‍ ഇന്‍ഷൂറന്‍സ് പോളിസിയുടെ ഗുണം. ഇതിന്റെ നടപടിക്രമങ്ങളാവട്ടെ വളരെ ലളിതവുമാണ്.

നഷ്ടപ്പെട്ടാല്‍ ദുഖിക്കേണ്ട

അപകടങ്ങള്‍, കൊള്ളകള്‍, ജീവനക്കാരുടെ തട്ടിപ്പുകള്‍, ഭീകരവാദ പ്രവര്‍ത്തനങ്ങള്‍ തുടങ്ങിയവ കാരണം ലോക്കറില്‍ സൂക്ഷിച്ചിരിക്കുന്ന സാധനങ്ങള്‍ക്കുണ്ടാവുന്ന നഷ്ടം, തേയ്മാനം എന്നിവയ്ക്ക് പോളിസിയുടെ കവറേജ് ലഭിക്കും. ഇതോടൊപ്പം സൂക്ഷിച്ചിരിക്കുന്ന ഓഹരി സര്‍ട്ടിഫിക്കറ്റുകള്‍, ഡിപ്പോസിറ്റ് റസീറ്റുകള്‍, ടൈറ്റില്‍ ഡീഡുകള്‍, കൈയെഴുത്തു പ്രതികള്‍, പാസ്‌പോര്‍ട്ട്, ഇന്‍ഷൂറന്‍സ് പോളിസി രേഖകള്‍ തുടങ്ങിയവയെല്ലാം പോളിസിയില്‍ കവര്‍ ചെയ്യപ്പെടും.

കവറേജ് ലഭിക്കാത്തവ

എന്നാല്‍ ദുരൂഹ സാഹചര്യത്തില്‍ ലോക്കറുകളില്‍ നിന്ന് സാധനങ്ങള്‍ അപ്രത്യക്ഷമാവല്‍, അക്കൗണ്ടിംഗ് പഴിവ് കാരണമോ മറ്റോ സാധനങ്ങള്‍ നഷ്ടപ്പെടല്‍, സുരക്ഷിതമായ ബാങ്ക് ലോക്കറുകളിലല്ലാതെ സൂക്ഷിച്ചിരിക്കുന്ന അമൂല്യ വസ്തുക്കള്‍ എന്നിവയ്ക്ക് കവറേജ് ലഭിക്കില്ല.