എം‌എസ്എംഇ മേഖലയ്ക്കുള്ള സർക്കാരിന്റെ ക്രെഡിറ്റ് ഗ്യാരണ്ടി പദ്ധതി ഒക്ടോബറിനപ്പുറം നീട്ടുമോ?

എം‌എസ്‌എംഇ മേഖലയ്ക്കായി മൂന്ന് ലക്ഷം കോടി രൂപ അടിയന്തര ക്രെഡിറ്റ് ലൈൻ ഗ്യാരണ്ടി സ്കീം (ഇസി‌എൽ‌ജി‌എസ്) ഒക്ടോബറിനപ്പുറം നീട്ടാൻ സാധ്യതയില്ലെന്ന് വൃത്തങ്ങൾ അറിയിച്ചു. കൊറോണ വൈറസ് മഹാമരി മൂലമുണ്ടായ മാന്ദ്യം ബാധിച്ച, മൈക്രോ, ചെറുകിട, ഇടത്തരം സംരംഭങ്ങൾക്കും (എം‌എസ്എംഇ) ബിസിനസുകൾക്കും സാമ്പത്തിക സഹായം നൽകുന്നതിനായുള്ള പദ്ധതിയാണിത്. ദുരിതബാധിതരായ എല്ലാവർക്കും പിന്തുണ നൽകുകയാണ് ലക്ഷ്യമെന്നും പദ്ധതി വിപുലീകരിക്കേണ്ട ആവശ്യമില്ലെന്നും വൃത്തങ്ങൾ അറിയിച്ചു.

പദ്ധതി വിപുലീകരിച്ചു

ഓഗസ്റ്റ് ഒന്നിന്, സർക്കാർ മൂന്ന് ലക്ഷം കോടി രൂപയുടെ പദ്ധതിയുടെ വ്യാപ്തി വർദ്ധിപ്പിച്ചു. കുടിശ്ശികയുള്ള വായ്പകളുടെ ഉയർന്ന പരിധി ഇരട്ടിയാക്കി. കൂടുതൽ കമ്പനികൾക്ക് ഈ സ്കീമിൽ നിന്ന് പ്രയോജനം ലഭിക്കുമെന്ന് ഉറപ്പാക്കുന്നതിന്, ഫെബ്രുവരി 29 വരെ കുടിശ്ശികയുള്ള വായ്പകളുടെ ഉയർന്ന പരിധി 25 കോടിയിൽ നിന്ന് 50 കോടി രൂപയായി ഉയർത്താൻ തീരുമാനിച്ചു. സ്കീമിന് കീഴിലുള്ള ഗ്യാരണ്ടീഡ് എമർജൻസി ക്രെഡിറ്റ് ലൈൻ (ജിഇസിഎൽ) ഫണ്ടിന്റെ പരമാവധി തുക 5 കോടിയിൽ നിന്ന് 10 കോടി രൂപയായി ഉയർത്തി.

മാറ്റങ്ങൾ

കൊറോണ വൈറസ് മഹാമാരിയുടെ പശ്ചാത്തലത്തിൽ സർക്കാരിന്റെ 20.97 ലക്ഷം കോടി രൂപയുടെ സാമ്പത്തിക പാക്കേജിന്റെ ഭാഗമായി പ്രഖ്യാപിച്ച ഈ പദ്ധതി പിന്നീട് 250 കോടി രൂപയുടെ വാർഷിക വിറ്റുവരവുള്ള കമ്പനികൾക്ക് ബാധകമാക്കി. നേരത്തെ 100 കോടി രൂപയായിരുന്നു പരിധി. ബാങ്കുകളും നോൺ ബാങ്കിംഗ് ധനകാര്യ കമ്പനികളും (എൻ‌ബി‌എഫ്‌സി) 1,87,579 ലക്ഷം കോടി രൂപയുടെ വായ്പയ്ക്ക് അംഗീകാരം നൽകി. വിതരണം ഒക്ടോബർ 5 വരെ 1,36,140 കോടി രൂപയാണ്.

അധിക ധനസഹായം

എം‌എസ്‌എം‌ഇ മേഖലയ്ക്ക് ഇസി‌എൽ‌ജി‌എസ് വഴി 9.25 ശതമാനം ഇളവ് നിരക്കിൽ മൂന്ന് ലക്ഷം കോടി രൂപ വരെ അധിക ധനസഹായം മെയ് 20 ന് മന്ത്രിസഭ അംഗീകരിച്ചു. ഈ പദ്ധതി പ്രകാരം നാഷണൽ ക്രെഡിറ്റ് ഗ്യാരണ്ടി ട്രസ്റ്റി കമ്പനി (എൻ‌സി‌ജി‌ടി‌സി) യോഗ്യരായ എം‌എസ്‌എംഇകൾക്കും താൽപ്പര്യമുള്ള മൈക്രോ യൂണിറ്റ് ഡെവലപ്‌മെന്റ് ആൻഡ് റീഫിനാൻസ് ഏജൻസി (മുദ്ര) വായ്പക്കാർക്കും മൂന്ന് ലക്ഷം കോടി രൂപ അധിക ധനസഹായത്തിനായി 100 ശതമാനം ഗ്യാരണ്ടി കവറേജ് നൽകും.

ബാധകമാകുന്നത് ആർക്ക്?

പദ്ധതി പ്രഖ്യാപിച്ച തീയതി മുതൽ ഒക്ടോബർ 31 വരെയുള്ള കാലയളവിൽ അല്ലെങ്കിൽ ജി‌ഇ‌സി‌എല്ലിന് കീഴിൽ 3 ലക്ഷം കോടി രൂപ അനുവദിക്കുന്നതുവരെ ജി‌ഇ‌സി‌എൽ സൌകര്യത്തിന് കീഴിൽ അനുവദിച്ച എല്ലാ വായ്പകൾക്കും ഈ പദ്ധതി ബാധകമാകും.