1.5 ലക്ഷം വിപ്രോ ജീവനക്കാർക്ക് ഡിസംബർ ഒന്ന് മുതൽ ശമ്പള വർദ്ധനവ്

പ്രമുഖ ഐടി കമ്പനിയായ വിപ്രോ ലിമിറ്റഡ് തങ്ങളുടെ ജീവനക്കാരിൽ 80 ശതമാനത്തിനും ഡിസംബർ ഒന്ന് മുതൽ ശമ്പള വർദ്ധനവ് നടപ്പിലാക്കും. മികച്ച പ്രകടനം കാഴ്ചവയ്ക്കുന്നവർക്കുള്ള പ്രമോഷനുകളും ഇതിൽ ഉൾപ്പെടും. കൊറോണ വൈറസ് മഹാമാരി മൂലമുണ്ടായ തടസ്സങ്ങളുടെയും തുടർന്നുള്ള പ്രതിസന്ധിയുടെയും അനിശ്ചിതകാലങ്ങളിൽ ബിസിനസ്സ് വളർച്ച ഉറപ്പുവരുത്തിയതിനുള്ള ജീവനക്കാർക്കുള്ള പ്രതിഫലമാണിത്.

ശരാശരി ശമ്പള വർദ്ധനവ്

ബെംഗളൂരു ആസ്ഥാനമായ സോഫ്റ്റ്വെയർ സേവന കമ്പനിയായ വിപ്രോ ജീവനക്കാർക്ക് ഒറ്റ അക്ക ശരാശരി ശമ്പള വർദ്ധനവ് ഏർപ്പെടുത്തുന്നതിനെക്കുറിച്ച് ആലോചിക്കുന്നുണ്ടെങ്കിലും മുതിർന്ന ഉദ്യോഗസ്ഥർക്ക് ശമ്പള വർദ്ധനവ് നൽകാനുള്ള തീരുമാനം ഇതുവരെ എടുത്തിട്ടില്ല. 

ജീവനക്കാർ

നിലവിൽ ഇന്ത്യയിലെ നാലാമത്തെ വലിയ ഐടി സേവന കമ്പനിയായ വിപ്രോയിൽ 1.85 ലക്ഷത്തിലധികം ആളുകൾ ജോലി ചെയ്യുന്നുണ്ട്. ടാറ്റാ കൺസൾട്ടൻസി സർവീസസ് (ടിസിഎസ്), ഇൻഫോസിസ്, എച്ച്സിഎൽ തുടങ്ങി നിരവധി വൻകിട ഐടി സേവന കമ്പനികളും കൊവിഡ് -19 പ്രതിസന്ധി കാരണം ഈ വർഷത്തിന്റെ തുടക്കത്തിൽ ശമ്പള വർദ്ധനവ് നൽകിയിരുന്നില്ല.

വരുമാനം

2020 സെപ്റ്റംബർ 30 ന് അവസാനിച്ച രണ്ടാം പാദത്തിൽ ഏകീകൃത അറ്റാദായത്തിൽ വിപ്രോ 3.40 ശതമാനം അഥവാ 2,465.70 കോടി രൂപയുടെ ഇടിവ് രേഖപ്പെടുത്തിയിരുന്നു. ഈ വെല്ലുവിളി നിറഞ്ഞ സമയങ്ങളിൽ തടസ്സമില്ലാത്ത ബിസിനസ്സ് വളർച്ച ഉറപ്പുവരുത്തുന്നതിലും ഉയർന്ന സേവന നിലവാരം പുലർത്തുന്നതിലും ജീവനക്കാർ ശ്രദ്ധേയമായ ഊർജ്ജസ്വലത പ്രകടിപ്പിച്ചിരുന്നതായി വിപ്രോ വക്താവ് പറഞ്ഞു.

ടിസിഎസ് ശമ്പള വർദ്ധനവ്

എല്ലാ ജീവനക്കാർക്കും ഒക്ടോബർ ഒന്നിന് ഐടി വ്യവസായ പ്രമുഖനായ ടിസിഎസ് ശമ്പള വർദ്ധനവ് ഏർപ്പെടുത്തിയിരുന്നു. അടുത്ത വർഷം ജനുവരി മുതൽ ഇൻഫോസിസ് എല്ലാ ജീവനക്കാർക്കും ശമ്പള വർധനവും മികച്ച പ്രകടനത്തിന് ഡിസംബറിൽ പ്രത്യേക പ്രോത്സാഹനവും പ്രഖ്യാപിച്ചിരുന്നു.

ഇൻഫോസിസ് ശമ്പള വർദ്ധനവ്

ഇന്ത്യയിലെ രണ്ടാമത്തെ വലിയ സോഫ്റ്റ്‌വെയർ കമ്പനിയായ ഇൻഫോസിസ് 100 ശതമാനം വേരിയബിൾ പേയും രണ്ടാം പാദത്തിന് പ്രത്യേക ഇൻസെൻ്റീവും നൽകുമെന്നും അടുത്ത വർഷം ജനുവരി ഒന്നിന് എല്ലാ തലങ്ങളിലുമുള്ള ശമ്പള വർധനയും പ്രമോഷനുകളും നൽകുമെന്നും ഒക്ടോബറിൽ പറഞ്ഞിരുന്നു.