കേന്ദ്രബജറ്റ് 2026: 17 കാന്‍സര്‍ മരുന്നുകള്‍ വിലകുറഞ്ഞതാകും

17 മരുന്നുകളുടെ അടിസ്ഥാന കസ്റ്റംസ് തീരുവ ഒഴിവാക്കാന്‍ ധനമന്ത്രി നിര്‍മ്മല സീതാരാമന്‍ ബജറ്റ് പ്രസംഗത്തില്‍ നിര്‍ദ്ദേശം നല്‍കി. കാന്‍സര്‍ രോഗികളുടെ ചികിത്സാ ചെലവ് കുറയ്ക്കുന്നതിന്റെ ഭാഗമായാണ് ഇത്. ഏഴ് അപൂര്‍വ്വ രോഗങ്ങള്‍ക്കായുള്ള മരുന്നുകള്‍, പ്രത്യേക മെഡിക്കല്‍ ഭക്ഷ്യോത്പന്നം എന്നിവയ്ക്കും ഇറക്കുമതി ഇളവ് ബാധകമാകും.

വ്യക്തിഗത ഉപയോഗത്തിനായി ഇറക്കുമതി ചെയ്യുന്ന എല്ലാ വസ്തുക്കളുടെയും തീരുവ 20 ശതമാനത്തില്‍ നിന്ന് 10 ശതമാനമായി കുറയ്ക്കും. "രോഗികള്‍ക്ക്, പ്രത്യേകിച്ച് കാന്‍സര്‍ ബാധിച്ചവര്‍ക്ക് ആശ്വാസം നല്‍കുന്നതിനായി, 17 മരുന്നുകള്‍ക്കുള്ളതും അപൂര്‍വ്വ രോഗ ചികിത്സയില്‍ ഉപയോഗിക്കുന്ന മരുന്നുകള്‍ക്കുള്ളതും പ്രത്യേക മെഡിക്കല്‍ ഭക്ഷണത്തിന് മേലുള്ളതുമായ വ്യക്തിഗത ഇറക്കുമതി തീരുവ ഒഴിവാക്കാന്‍ ഞാന്‍ നിര്‍ദ്ദേശിക്കുന്നു," നിര്‍മ്മല സീതാരാമന്‍ ബജറ്റ് പ്രസംഗത്തില്‍ പറഞ്ഞു.

ഇന്ത്യയില്‍ പ്രമേഹം,കാന്‍സര്‍, ഓട്ടോ-ഇമ്മ്യൂണ്‍ രോഗ ബാധിതര്‍ ഏറുന്നതായി ധനമന്ത്രി നിരീക്ഷിച്ചു. അതുകൊണ്ടുതന്നെ ഈ രോഗങ്ങള്‍ക്കുള്ള മരുന്നുകള്‍ താങ്ങാവുന്നതാക്കുക പ്രധാനമാണ്.മൂന്ന് പുതിയ ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് ആയുര്‍വേദകള്‍, ആയുഷ് ഫാര്‍മസികളുടേയും മരുന്ന് പരിശോധനാ ലബോറട്ടറികളുടേയും നവീകരണം, ജാംനഗറിലെ ലോകാരോഗ്യ സംഘടന ഗ്ലോബല്‍ സെന്റര്‍ ഫോര്‍ ട്രഡീഷണല്‍ മെഡിസിന്റെ വികസനം എന്നിവയും ധനമന്ത്രി പ്രഖ്യാപിച്ചു.