<p><strong>

</strong>ഇന്‍ഫോസിസ് ടെക്‌നോളജീസിന്റെ ആദ്യപാദ സാമ്പത്തിക ഫലം നിരാശപ്പെടുത്തി. നികുതിയ്ക്കുശേഷം 2450 കോടി രൂപയുടെ ലാഭമുണ്ടാകുമെന്നാണ് വിദഗ്ധര്‍ കണക്കുകൂട്ടിയിരുന്നത്. എന്നാല്‍ പുതിയ റിപ്പോര്‍ട്ട് അനുസരിച്ച് ഇത് 2289 കോടി രൂപ മാത്രമാണ്. കഴിഞ്ഞ വര്‍ഷം ഇതേ സമയം കമ്പനി 1722 കോടി രൂപയുടെ ലാഭമാണ് നേടിയിരുന്നത്.</p> <p>നികുതി അടയ്ക്കുന്നതിനു മുമ്പുള്ള വരുമാനം 2693 കോടി രൂപയാണെന്നത് നിരാശപ്പെടുത്തുന്ന കണക്കായാണ് നിക്ഷേപകര്‍ വിലയിരുത്തിയത്. അതുകൊണ്ടു തന്നെ റിപ്പോര്‍ട്ട് പുറത്തുവന്ന ഉടനെ അത് ഓഹരി വിപണിയില്‍ പ്രതികൂലമായി പ്രതിഫലിക്കുകയും ചെയ്തു.</p> <p>പുതിയ സാമ്പത്തിക വര്‍ഷത്തില്‍ കമ്പനിയുടെ ഇപിഎസ് (ഏര്‍ണിങ് പെര്‍ ഷെയര്‍) 40.06 രൂപയാണ്. 51 പുതിയ ക്ലൈന്റുകളെയാണ് ഇന്‍ഫോസില്‍ ഈ കാലയളവില്‍ അധികം നേടിയത്.</p> <p>രാജ്യത്തെ ഏറ്റവും വലിയ രണ്ടാമത്തെ ഐടി കമ്പനിയായ ഇന്‍ഫോസിസ് യുഎസ് ഡോളര്‍ വരുമാനത്തില്‍ നേട്ടമുണ്ടാക്കിയത് വിപണിയെ അത്ഭുതപ്പെടുത്തി. 2000കോടി രൂപയുടെ ഓഹരികള്‍ തിരിച്ചുവാങ്ങുമെന്ന റിപ്പോര്‍ട്ടുകളും കമ്പനി തള്ളിയിട്ടുണ്ട്.</p> <p>ആഗോള സാമ്പത്തികവിപണി ഇപ്പോഴും അനിശ്ചിതത്വത്തിലാണ്. തീര്‍ച്ചയായും ഇത് ഏറ്റവും കൂടുതല്‍ പ്രതികൂലമായി ബാധിക്കുന്നത് ഐടി കമ്പനികളെ തന്നെയാണ്. അതുകൊണ്ടു തന്നെ ഐടി കമ്പനികളുടെ സാമ്പത്തികപാദഫലങ്ങള്‍ ഇന്ത്യന്‍ ഓഹരി വിപണിയെ സംബന്ധിച്ചിടത്തോളം നിര്‍ണായകമാണ്.</p>