<p><strong>

</strong>മുംബൈ: 335 പോയിന്റോളം മുന്നോട്ടുകുതിച്ച മുംബൈ ഓഹരി സൂചികയെ പൊതുമേഖലാ ബാങ്കുകളുടെ മോശം സാമ്പത്തികാവകലോകന റിപ്പോര്‍ട്ടുകള്‍ താഴേക്ക് വലിച്ചു. ബാങ്കുകളുടെ നിശ്ചല ആസ്തിയുടെ(എന്‍പിഎ) കാര്യത്തിലുണ്ടായ ഇടിവാണ് മേഖലയ്ക്ക് മൊത്തം തിരിച്ചടിയായത്.</p> <p>ഐസിഐസിഐ ബാങ്ക് ജൂണ്‍ 30ന് അവസാനിച്ച സാമ്പത്തിക പാദത്തില്‍ 1815.05 കോടിയുടെ ലാഭമാണുണ്ടാക്കിയത്. തൊട്ടുമുമ്പത്തെ വര്‍ഷം ഇതേ സമയത്ത് ഇത് 1332.2 കോടി രൂപയായിരുന്നു. ഇരുപാദങ്ങളുമായി താരതമ്യം ചെയ്യുമ്പോള്‍ എന്‍പിഎ 0.73 ശതമാനത്തില്‍ നിന്നും 0.71 ശതമാനത്തിലേക്ക് താഴ്ന്നു.</p> <p>യൂറോപ്യന്‍ പ്രതിസന്ധി പരിഹരിക്കുന്നതിന് ആവുന്നതെല്ലാം ചെയ്യുമെന്ന്് യൂറോപ്യന്‍ സെന്‍ട്രല്‍ ബാങ്ക് വ്യക്തമാക്കിയത് ആഗോളതലത്തില്‍ തന്നെ ഓഹരി വിപണിയില്‍ പുതിയ ഉണര്‍വുണ്ടാക്കിയിരുന്നു.</p> <p>സെന്‍സെക്‌സ് 199.37 പോയിന്റ് വര്‍ധിച്ച് 16839.19ലും ദേശീയ ഓഹരി സൂചികയായ നിഫ്റ്റി 56.85 പോയിന്റ് കൂടി 5099.85ലും വില്‍പ്പന അവസാനിപ്പിച്ചു. കഴിഞ്ഞ കുറെ ദിവസങ്ങളായി തിരിച്ചടികള്‍ ഏറ്റുകൊണ്ടിരിക്കുന്ന ടാറ്റാ സ്റ്റീല്‍ വെള്ളിയാഴ്ച ഗംഭീരമായ തിരിച്ചുവരവാണ് നടത്തിയത്.</p> <p>ടാറ്റാ മോട്ടോര്‍സ്, സ്‌റ്റെര്‍ലൈറ്റ് ഇന്‍ഡസ്ട്രീസ്, എച്ച്ഡിഎഫ്‌സി ബാങ്ക്, ഹിന്‍ഡാല്‍കോ ഇന്‍ഡസ്ട്രീസ് കമ്പനികളും നേട്ടമുണ്ടാക്കി. പഞ്ചാബ് നാഷണല്‍ ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, ജയപ്രകാശ് അസോസിയേറ്റ്‌സ്, ബാങ്ക് ഓഫ് ബറോഡ, കോടാക് മഹീന്ദ്ര ബാങ്ക് ഓഹരികള്‍ താഴേക്കിറങ്ങി.</p>