<p><strong>

</strong>യുപിഎ സര്‍ക്കാറിനു പിന്തുണകൊടുക്കുമെന്ന സമാജ്‌വാദി പാര്‍ട്ടി നേതാവ് മുലായം സിങ് യാദവിന്റെ പ്രസ്താവന പുറത്തുവന്നതിനു തൊട്ടുപിറകെ വന്ന നികുതി ഇളവ് നിര്‍ദ്ദേശങ്ങള്‍ ഓഹരി വിപണിയെ 500 പോയിന്റോളം മുകളിലേക്കുയര്‍ത്തി.</p> <p>പ്രാദേശിക കമ്പനികള്‍ വിദേശരാജ്യങ്ങളില്‍ നിന്നും പണം സ്വീകരിക്കുമ്പോള്‍ നല്‍കേണ്ട നികുതിയിലാണ് ധനകാര്യമന്ത്രി പി ചിദംബരം ഇളവ് പ്രഖ്യാപിച്ചത്. പുതിയ തീരുമാനത്തോടെ ജൂലായ് 2012 മുതല്‍ ജൂണ്‍ 2015വരെ വാങ്ങുന്ന ഫണ്ടുകള്‍ അഞ്ചു ശതമാനം മാത്രം നികുതി നല്‍കിയാല്‍ മതി.</p> <p>സര്‍ക്കാര്‍ തീരുമാനം പുറത്തുവന്നതോടെ മുംബൈ ഓഹരി സൂചികയായ സെന്‍സെക്‌സ് 18864.18 വരെ ഉയര്‍ന്നു. ദേശീയ സൂചിക 5718.50ല്‍ തൊട്ടതിനുശേഷം താഴോട്ടിറങ്ങി. നികുതി ഇളവ് നിര്‍ദ്ദേശം നിര്‍മാണമേഖലയില്‍ പ്രവര്‍ത്തിക്കുന്ന കമ്പനികളെയാണ് ഏറെ സഹായിച്ചത്.</p> <p>ജെയ്പീ ഇന്‍ഫ്രാടെക്, റിലയന്‍സ് ഇന്‍ഫ്രാ, റിലയന്‍സ് കാപ്പിറ്റല്‍, ജിഎംആര്‍ ഇന്‍ഫ്രാസ്ട്രക്ചര്‍, ആദിത്യ ബിര്‍ള നുവോ എന്നീ ഓഹരികള്‍ മികച്ച മുന്നേറ്റമാണ് കാഴ്ചവെച്ചത്.</p> <p>ടെലിഫോണ്‍ നിരക്കുകള്‍ 25 ശതമാനത്തോളം ഉയര്‍ത്താനുള്ള റിലയന്‍സ് കമ്യൂണിക്കേഷന്റെ തീരുമാനം വിപണിയെ ഉത്തേജിപ്പിച്ചു.</p>