ദില്ലി: പണപ്പെരുപ്പവും കുറഞ്ഞ സാമ്പത്തിക വളര്‍ച്ചാനിരക്കും സമ്പദ് വ്യവസ്ഥയെ തളര്‍ത്തുന്നതിന് പരിഹാരമായി റിസര്‍വ്വ് ബാങ്ക് റിപ്പോ നിരക്കുകള്‍ കൂട്ടുന്നതിന് സാദ്ധ്യത. ഒക്ടോബര്‍ 29 ചൊവ്വാഴ്ച നടക്കുന്ന പണ വായ്പാ നയ അവലോകന വേളയില്‍ ഇതുണ്ടാവുമെന്ന് ധനകാര്യ വിദഗ്ധരും സാമ്പത്തിക ശാസ്ത്രജ്ഞമാരും കരുതുന്നു.

റിസര്‍വ്വ് ബാങ്കില്‍ നിന്നും പണം കടമെടുക്കുന്ന മറ്റു ബാങ്കുകള്‍ നല്‍കേണ്ട പലിശാ നിരക്കാണ് റിപ്പോ. നിലവില്‍ ഇത് 7.5 ശതമാനമാണ്. റിപ്പോ നിരക്ക് കൂടുന്നതോടെ വ്യക്തിഗത ലോണുകളുടെയും വാഹന, ഭവന ലോണുകളുടെയും പലിശയും ബാങ്കുകള്‍ക്ക് വര്‍ധിപ്പിക്കേണ്ടിവരും.

കഴിഞ്ഞ ഏഴു മാസമായി പണപ്പെരുപ്പത്തിന്റെ വളര്‍ച്ച ഉയരങ്ങളിലേയ്ക്കാണ്. സെപ്തംബറില്‍ ഇത് 6.46ല്‍ എത്തി. എന്നാല്‍ റിസര്‍വ്വ് ബാങ്കില്‍ നിന്നും മറ്റ് ബാങ്കുകള്‍ കടമെടുക്കുന്ന മാര്‍ജിനല്‍ സ്്റ്റാന്‍ഡിങ്ങ് ഫെസിലിറ്റി അക്കൗണ്ടില്‍ നിന്നുമുളള പലിശ നിരക്ക് ആര്‍. ബി. ഐ കുറച്ചേയ്ക്കാന്‍ സാദ്ധ്യതയുണ്ട്.