<p>ജോലിക്കൊരപേക്ഷ, കച്ചവടത്തിനൊരു തുമ്പ്, സഹപ്രവര്‍ത്തകര്‍ക്കുള്ള നിര്‍ദ്ദേശങ്ങള്‍, സംശയനിവാരണം.... ഈ കാലഘട്ടത്തില്‍ ഒഴിച്ചുകൂടാനാവാത്തതാണ് ഇമെയില്‍ വര്‍ത്തമാനം. ആര്‍ക്ക് ഇമെയിലയച്ചാലും അവരുടെ ശ്രദ്ധ പിടിച്ചുപറ്റാനുള്ള ആദ്യത്തെ അവസരാണ് സബ്ജക്ട് ലൈന്‍ (വിഷയസൂചന). എന്നാല്‍ ഏറ്റവും കൂടുതല്‍ അവഗണിക്കപ്പെടുന്നതും. എന്തു ചെയ്യണം, എന്തു ചെയ്യരുത്, എന്തുകൊണ്ട് എന്നു നോക്കാം.</p> <p><strong>

</strong></p> <p><strong>ഇമെയില്‍ സാധാരണ തെറ്റുകള്‍</strong></p> <p>1. വിഷയസൂചന (സബ്ജക്ട് ലൈന്‍) എഴുതാതെ ഇമെയില്‍ അയയ്ക്കരുത്. കിട്ടുന്നയാളെ പ്രകോപിപ്പിക്കുന്ന കാര്യമാണത്. എന്തിനെപ്പറ്റിയാണ് ഈ മെയില്‍ എന്നറിയണമെങ്കില്‍ അതു തുറന്നുനോക്കണം എന്നു വരുന്നത് മെനക്കേടാണ്. ഇപ്പോള്‍ വായിക്കണോ, തിരക്കൊഴിഞ്ഞിട്ടു പിന്നെ വായിച്ചാലും മതിയോ എന്നൊക്കെ തീരുമാനിക്കാന്‍ സഹായിക്കുന്ന ഒരു ചെറുവരിയാണ് അവിടെ വേണ്ടത്. അവിടം കാലിയായി കിടന്നാല്‍ അതങ്ങു ഡിലീറ്റ് ചെയ്തുകളയാനാകും ആദ്യം തോന്നുക.</p> <p>2. വലിച്ചുനീട്ടിയെഴുതരുത്. കഥ മുഴുവന്‍ പറയാനുളള സ്ഥലം സബ്ജക്ട്‌ലൈനില്‍ ഇല്ല. മൊബൈല്‍ ഫോണിലാണു വായിക്കുന്നതെങ്കില്‍ 30 അക്ഷരം, കമ്പ്യൂട്ടറിലാണെങ്കില്‍ 5060 അക്ഷരം അത്രയേ തെളിഞ്ഞുകാണൂ.</p> <p>3. എന്തെങ്കിലുമെഴുതി നിറയ്ക്കരുത് സബ്ജക്ട് ലൈന്‍. ചെറുതും വ്യ്ക്തവുമായിരിക്കണം അത്. ഉള്ളിലെന്താണ് എഴുതിയിരിക്കുന്നത് എന്ന് ഏറ്റവും പ്രധാന സൂചനകള്‍ നല്‍കുന്നതാകണം അവിടെ തെളിയുന്നത്.</p> <p>4. ഹലോ, താങ്ക് യൂ ഒക്കെ ഇമെയിലിന്റെ ഉള്ളില്‍ മതി. 'ഒരു ജോലിയെക്കുറിച്ച് അറിയാന്‍' എന്നതും അത്ര നല്ല വിഷയസൂചന അല്ല. 'സെക്രട്ടറി തസ്തികയിലേയ്ക്ക് അപേക്ഷ; റഫറന്‍സ് നാരായണന്‍ മാസ്റ്റര്‍' എന്നു വച്ചാല്‍ ഏതാണ്ട് വൃത്തിയായി കിട്ടുന്നയാള്‍ക്ക് നാരായണന്‍മാസ്റ്ററെ പരിചയമുളളതാണെങ്കില്‍. മാസ്റ്ററെ വ്യക്തിപരമായല്ല, അദ്ദേഹത്തിന്റെ ഓഫീസിന്റെ പേരിലാണ് പരിചയമെങ്കില്‍ 'സെക്രട്ടറി തസ്തിക, റഫറന്‍സ് നാരായണന്‍ മാസറ്റര്‍, ടെലികോം ഓഫീസ്' എന്ന മട്ടിലാകാം വിഷയസൂചന.</p> <p>5. വിഷയമോ ഇമെയിലോ മുഴുവനായി വലിയക്ഷരത്തില്‍ (അക്ഷരവലുപ്പമല്ല, ഇംഗ്ലീഷ് ക്യാപ്പിറ്റല്‍ ലെറ്ററുകള്‍) എഴുതരുത്. വായിക്കാന്‍ വല്യ കഷ്ടപ്പാടാണത്. അതു മാത്രമല്ല കാര്യം. ഡിജിറ്റല്‍ ലോകത്ത് തെറിവിളിക്കുകയോ കലിതുള്ളുകയോ ചെയ്യുന്നതിനുള്ള ഉപാധിയാണ്ക്ഷമയുടെ നെല്ലിപ്പലക കണ്ടുകഴിയുമ്പോഴുള്ള പ്രയോഗമാണ് വലിയ അക്ഷരങ്ങള്‍ കൊണ്ട് മാത്രമുള്ള ഇമെയില്‍.</p>