<p><strong>ഫ്‌ളിപ്കാര്‍ട്ട്, ആമസോണ്‍ പ്രഭൃതികളേ കരുതിയിരുന്നോളൂ, ഇന്ത്യാ പോസ്റ്റ് വരുന്നു</strong></p> <p>എന്തേയിത്ര വൈകി എന്നേ ചോദിക്കാനുള്ളൂ. ലോകത്തിലെ തന്നെ ഏറ്റവും വലിയ ചരക്കു-തപാല്‍ വാഹക സംവിധാനമുള്ള പ്രസ്ഥാനം ഇ-കോമേഴ്‌സിലേയ്ക്ക് ഇറങ്ങുന്നു. ആരാണിതെന്നോ? ഇന്ത്യാ പോസ്റ്റ്. അതേ, നമ്മുടെ തപാല്‍ വകുപ്പു തന്നെ. ഏഴായിരം കോടിയിലേറെ രൂപ മുതല്‍ മുടക്കിയാണ് തപാല്‍ വകുപ്പ് ഐ.ടി. അടിസ്ഥാന സൗകര്യങ്ങളും വിതരണസംവിധാനത്തിനുള്ള വാഹനനിരയും ഉഷാറാക്കുന്നത്. <br />ഇന്ത്യയെമ്പാടുമുള്ള സര്‍ക്കാര്‍, സ്വകാര്യ വിപണനക്കാരെ ഉപഭോക്താക്കളുമായി കോര്‍ത്തിണക്കാനുള്ള മഹാസംരംഭമാണ് പദ്ധതി.</p> <p><strong>

</strong><br />ഒന്നര ലക്ഷത്തിലേറെ പോസ്റ്റ് ഓഫിസുകളും അഞ്ചു ലക്ഷത്തോളം ജീവനക്കാരുമുള്ള തപാല്‍ വകുപ്പിന്റെ ഏറ്റവും വലിയ കരുത്ത് അവരുടെ ഈ വിതരണ നാഡീവ്യവസ്ഥ തന്നെയാകും. അതിവിദൂര ഗ്രാമങ്ങളില്‍ തോണി തുഴഞ്ഞും പുഴ നീന്തിക്കടന്നും എത്തുന്ന തപാല്‍വിതരണക്കാരുടെ കാര്യക്ഷമതയും സമര്‍പ്പണബോധവും മെട്രോ നഗരങ്ങളില്‍ മാത്രം കേന്ദ്രീകരിച്ചിരിക്കുന്ന കോര്‍പ്പറേറ്റുകള്‍ക്ക് അവകാശപ്പെടാന്‍ കഴിയില്ലല്ലോ. <br />ഗ്രാമഗ്രാമാന്തരങ്ങളിലെ സാധാരണക്കാര്‍ക്കു കൂടി പ്രാപ്യമായ വിധത്തിലും ആവശ്യമുള്ള ഇനങ്ങളിലും കേന്ദ്രീകരിച്ചാവും തപാല്‍വകുപ്പിന്റെ ഇ-കൊമേഴ്‌സ് വികസനം. <br />പോസ്റ്റല്‍ സേവിങ്‌സ് ബാങ്ക് നിയമങ്ങള്‍ പരിഷ്‌കരിച്ച് എടിഎം കാര്‍ഡ് അടക്കമുള്ള ആധുനിക ബാങ്കിങ് സൗകര്യങ്ങള്‍ നല്‍കാന്‍ പോകുകയാണ്. വില്‍ക്കുന്നയാള്‍ക്കും വാങ്ങുന്നയാള്‍ക്കും പോസ്റ്റല്‍ ബാങ്കില്‍ അക്കൗണ്ടുണ്ടെങ്കില്‍ കച്ചവടം എത്ര അനായാസം. സ്വകാര്യ ക്രെഡിറ്റ് കാര്‍ഡുകളുടെ കഴുത്തറപ്പന്‍ ഫീസും മറ്റും പേടിക്കേണ്ട. ഇതാണ് തപാല്‍വകുപ്പിന്റെ മറ്റൊരു വലിയ കരുത്ത്. <br />സര്‍ക്കാര്‍ പിന്തുണയും വിശ്വാസ്യതയും മറ്റൊരു കരുത്ത്. <br />വലിയ സര്‍ക്കാര്‍ സംവിധാനങ്ങളുടെ കെടുകാര്യസ്ഥതയും പഴമയില്‍ നിന്ന് വിട്ടകന്നു പുതുമയെ പുണരാനുള്ള വൈമനസ്യവും തടസമായില്ലെങ്കില്‍ രാഷ്ട്രവികസനത്തില്‍ വലിയൊരു കാല്‍വയ്പായിരിക്കും ഇത്. കോര്‍പറേറ്റ് ഇ-കോമേഴ്‌സുകാര്‍ക്ക് വെല്ലുവിളിയാകുമ്പോള്‍ തന്നെ മറ്റ് എല്ലാ കച്ചവടക്കാര്‍ക്കും ഉണര്‍വ്വു പകരുന്ന വിതരണസംവിധാനമാകും ഇത് നന്നായി നടന്നാല്‍. <strong></strong></p>