തിരുപ്പതി വെങ്കടേശ്വരന് ഡിമാറ്റ് എക്കൗണ്ട്

ഹൈദരാബാദ്: തിരുപ്പതിയിലെ വെങ്കടേശ്വര ഭഗവാന്റെ പേരില്‍ ഡിമാറ്റ് എക്കൗണ്ട് തുറന്നു. രാജ്യത്തെ ഏറ്റവും സമ്പന്നമായ ക്ഷേത്രങ്ങളിലൊന്നാണ് തിരുപ്പതി ക്ഷേത്രം. ഓഹരികള്‍ കാണിക്കയായി വാങ്ങുന്നതിനുവേണ്ടിയാണ് ഈ സംവിധാനം ഒരുക്കിയിട്ടുള്ളത്. ഇതോടെ ഭക്തജനങ്ങള്‍ക്ക് ഷെയറുകളും സെക്യൂരിറ്റികളും ക്ഷേത്രത്തില്‍ കാണിക്കയായി നല്‍കാന്‍ സാധിക്കും.

1601010000384828 എന്നതാണ് ഡിമാറ്റ് എക്കൗണ്ട് നമ്പര്‍. സ്റ്റോക്ക് ഹോള്‍ഡിങ് കോര്‍പ്പറേഷന്‍ ഓഫ് ഇന്ത്യയാണ് എക്കൗണ്ട് നല്‍കിയിട്ടുള്ളത്. സെന്‍ട്രല്‍ ഡിപ്പോസിറ്ററി സര്‍വീസ് ലിമിറ്റഡിലെ(സിഡിഎസ്എല്‍) ഉദ്യോഗസ്ഥര്‍ നേരിട്ടെത്തിയാണ് എക്കൗണ്ട് ഓപണ്‍ ചെയ്തത്.

ഇതോടെ ലോകത്തിന്റെ ഏത് മൂലയില്‍ നിന്നും ഭക്തജനങ്ങള്‍ക്ക് ഓഹരികള്‍ ക്ഷേത്ര എക്കൗണ്ടിലേക്ക് ട്രാന്‍സ്ഫര്‍ ചെയ്യാന്‍ സാധിക്കും. ഇന്ത്യയില്‍ ആദ്യമായിട്ടായിരിക്കും ഇത്തരത്തിലുള്ള ഒരു ഷെയര്‍ ട്രേഡിങ് എക്കൗണ്ട് തുറക്കുന്നത്.

പല വന്‍കിട കമ്പനികളും ഓഹരികളിലെ ഒരു ഭാഗം ക്ഷേത്രത്തിലേക്ക് കാണിക്കയായി നല്‍കാന്‍ തയ്യാറായി മുന്നോട്ടു വന്നിട്ടുണ്ട്. ഭക്തജനങ്ങളുടെ ആവശ്യം പരിഗണിച്ചാണ് ഇത്തരത്തില്‍ എക്കൗണ്ട് തുറന്നതെന്ന് തിരുമല തിരുപ്പതി ദേവസ്ഥാനം എക്‌സിക്യുട്ടീവ് ഓഫിസര്‍ ഡി സാംബശിവ അറിയിച്ചു.