ദീപാവലിയോടനുബന്ധിച്ച് സംവത് 2072ന് തുടക്കം കുറിച്ചുകൊണ്ട് ബുധനാഴ്ച പ്രത്യേക മുഹൂര്‍ത്ത വ്യാപാരമുണ്ടാകും. ബി.എസ്.ഇ.യിലും എന്‍.എസ്.ഇ.യിലും വൈകീട്ട് 5.45 മുതല്‍ 6.45 വരെയായിരിക്കും പ്രത്യേക വ്യാപാരം. വ്യാഴാഴ്ച വിപണിക്ക് അവധിയായിരിക്കും. നിക്ഷേപങ്ങള്‍ക്ക് പുതിയ തുടക്കമിടാം.

സംവത് 2071ല്‍ സെന്‍സെക്‌സിന് നഷ്ടമായത് 2.18 ശതമാനമാണ്. ഡോളറിനെതിരെയുള്ള രൂപയുടെ മൂല്യത്തില്‍ 6.44 ശതമാനവും കുറവുണ്ടായി.കഴിഞ്ഞ പത്ത് വര്‍ഷത്തിനിടയിലെ ഏറ്റവും മോശം പ്രകടനം കാഴ്ചവെച്ച വര്‍ഷങ്ങളിലൊന്നാണ് കടന്നുപോകുന്നതെന്നുവേണം പറയാന്‍.

2011ല്‍ സെന്‍സെക്‌സിന് നഷ്ടമായത് 18 ശതമാനമാണ്. 2008ലാകട്ടെ 52 ശതമാനവും 2002ല്‍ നാല് ശതമാനവും മുംബൈ സൂചിക നഷ്ടത്തിലായിരുന്നു. നരേന്ദ്രമോദി സര്‍ക്കാരിന്റെ വിജയമന്ത്രങ്ങള്‍ ഇത്തവണ വിപണിയില്‍ യാഥാര്‍ഥ്യമാക്കാനായില്ല.

ഗുജറാത്തി ഹിന്ദുക്കളുടെ വിശ്വാസ പ്രകാരമുള്ള ഐശ്വര്യ വര്‍ഷമാണ് സംവത്. പുതു വര്‍ഷത്തിനു തുടക്കമാകുമ്പോള്‍ ഓഹരി വിപണിക്ക് മാത്രമല്ല, ബിസിനസ് ലോകത്തിന്റെയാകെ മനം നിറയെ മികച്ച കച്ചവടത്തിന്റെയും ലാഭത്തിന്റെയും ശുഭപ്രതീക്ഷകളാണുള്ളത്. നിലവിലെ നിക്ഷേപകര്‍ക്കും പുതു നിക്ഷേപകര്‍ക്കും ഏറ്റവും ലാഭകരമെന്ന് തോന്നുന്ന ഓഹരികള്‍ വാങ്ങാവുന്ന ഐശ്വര്യ നേരമായാണ് മുഹൂര്‍ത്ത വ്യാപാരത്തെ കണക്കാക്കുന്നത്. അക്ഷയ തൃതീയ പോലെ, സ്വര്‍ണവും വാഹനവും മറ്റും വാങ്ങാനുള്ള ശുഭ സമയമായും സംവത് വര്‍ഷാരംഭത്തെ കണക്കാക്കുന്നു.