നവംബറില്‍ മികച്ച നേട്ടം ഉണ്ടാക്കിയത് അരാണെന്നറിയാമോ? ഇക്കഴിഞ്ഞ നവംബറില്‍ വാഹന നിര്‍മ്മാണ കമ്പനികള്‍ കാഴ്ച്ചവച്ചത് മികച്ച വില്‍പന നേട്ടം. ഇതില്‍ ദീപാവലി സംവത് 2072 പുതുവത്സസര ആഘോഷങ്ങള്‍ എന്നിവയ്ക്ക് മികച്ച പങ്ക് ഉണ്ട് എന്നതില്‍ സംശയമില്ല.പുതിയ മോഡലുകള്‍ വിപണിയിലെത്തിയതും ആഘോഷ ഓഫറുകളും വില്‍പന കൂടാന്‍ സഹായകമായി.

മാരുതി സുസുക്കിയുടെ മൊത്തം വില്‍പന 9.7 ശതമാനം വര്‍ദ്ധിച്ചു. 1.20 ലക്ഷം കാറുകളാണ് മാരുതി കഴിഞ്ഞമാസം വിറ്റഴിച്ചത്. 2014 നവംബറില്‍ വില്‍പന 1.10 ലക്ഷം ആയിരുന്നു. ആഭ്യന്തര വിപണിയില്‍ മാരുതിയുടെ 1.10 ലക്ഷം കാറുകള്‍ വിറ്റഴിഞ്ഞു. വര്‍ദ്ധന 10.6 ശതമാനം. കഴിഞ്ഞ വര്‍ഷം നവംബറില്‍ വില്‍പന ഒരു ലക്ഷം യൂണിറ്റുകളായിരുന്നു.

ഫോഡ് ഇന്ത്യയുടെ വില്‍പന നേട്ടം 34.78 ശതമാനമാണ്. ആഭ്യന്തര വിപണിയില്‍ 55 ശതമാനവും നേട്ടമുണ്ടായി. 12,762ല്‍ നിന്ന് 17,189 യൂണിറ്റിലേക്കാണ് ഫോഡ് മൊത്തം വില്‍പന ഉയര്‍ത്തിയത്. റോയല്‍ എന്‍ഫീല്‍ഡ് കഴിഞ്ഞമാസം 48 ശതമാനം വില്‍പന വര്‍ദ്ധന നേടി. അശോക് ലെയ്‌ലാന്‍ഡ് 16 ശതമാനം നേട്ടവും കുറിച്ചു.

മഹീന്ദ്രയുടെ മൊത്തം വില്‍പന വളര്‍ച്ച 21 ശതമാനമാണ്. 34,292 യൂണിറ്റുകളില്‍ നിന്ന് 41,590 യൂണിറ്റുകളാക്കി മഹീന്ദ്ര കച്ചവടം മെച്ചപ്പെടുത്തി. ആഭ്യന്തര വിപണിയില്‍ 23 ശതമാനം നേട്ടം മഹീന്ദ്ര കുറിച്ചു. വില്‍പ്പന 32,100ല്‍ നിന്ന് 39,383ലേക്ക് മെച്ചപ്പെട്ടു.