ഐ.സി.ഐ.സി.ഐ ബാങ്ക് അടുത്തിടെ അവതരിപ്പിച്ച ഡിജിറ്റല്‍ ബാങ്കിംഗ് സൗകര്യമായ പോക്കറ്റ്‌സിന് മികച്ച സ്വീകാര്യത. ഈവര്‍ഷം ഫെബ്രുവരിയില്‍ അവതരിപ്പിച്ച ഈ മൊബൈല്‍ ആപ്പിലൂടെ 28 ലക്ഷം പേരാണ് ഡിജിറ്റലായി ബാങ്കിടപാടുകള്‍ നടത്തുന്നത്.

കഴിഞ്ഞ സെപ്ംബറില്‍ മാത്രം പോക്കറ്റ്‌സ് വഴി 7,800 കോടി രൂപയുടെ ഇടപാടുകള്‍ നടന്നുവെന്ന് ബാങ്ക് വ്യക്തമാക്കി. പ്രീപെയ്ഡായി ഉപയോഗിക്കാവുന്ന പോക്കറ്റസില്‍ പ്രതിമാസം പരമാവധി 10,000 രൂപയുടെ ഇടപാടുകള്‍ നടത്താം. ഇതിന് ഐ.സി.ഐ.സി.ഐ ബാങ്കിന്റെ അക്കൗണ്ട് ഉടമ ആകണമെന്നോ ബാങ്ക് അക്കൗണ്ട് വേണമെന്നോ നിര്‍ബന്ധമില്ല.ആന്‍ഡ്രോയിഡ്, ഐ.ഒ.എസ് ഫോണുകളില്‍ ഡൗണ്‍ലോഡ് ചെയ്തുപയോഗിക്കാവുന്ന ഡിജിറ്റല്‍ വാലറ്റാണ് പോക്കറ്റ്.

പോക്കറ്റ്‌സിന്റെ ഇടപാടുകാരില്‍ 75 ശതമാനവും ഇതര ബാങ്ക് ഉപഭോക്താക്കളാണ്. പേര്, ജനനതീയതി, മൊബൈല്‍ നമ്പര്‍, ഇ മെയില്‍, ജെന്‍ഡര്‍ എന്നിവ സമര്‍പ്പിക്കുമ്പോള്‍ കിട്ടുന്ന വണ്‍ടൈം പാസ്‌വേഡ് (ഒ.ടി.പി) ഉപയോഗിച്ച് യൂസര്‍നെയിമും പാസ്‌വേഡും നിര്‍മ്മിച്ച് ഇടപാടുകള്‍ ആരംഭിക്കാം. ഇടപാടുകള്‍ക്ക് ഫീസില്ല. നെറ്റ് ബാങ്കിംഗ്, ഡെബിറ്റ് കാര്‍ഡ് തുടങ്ങിയ ഉപയോഗിച്ചാണ് പോക്കറ്റ്‌സില്‍ പണം നിറയ്‌ക്കേണ്ടത്.