കാലാവധി പൂര്‍ത്തിയാകും മുന്‍പ് പ്രൊവിഡന്റ് ഫണ്ടില്‍ നിന്നും പണം പിന്‍വലിക്കുന്നതിന് നിയന്ത്രണം ഏര്‍പ്പെടുത്തുന്നതിന് എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷന്‍ തീരുമാനിച്ചതില്‍ പ്രതിഷേധങ്ങള്‍ വ്യാപകമാകുന്നു. ഇപിഎഫിലെ നിക്ഷേപം പിന്‍വലിക്കുന്നതിനുള്ള വ്യവസ്ഥകള്‍ കൂടുതല്‍ കര്‍ശനമാക്കി ഫെബ്രുവരിയിലാണ് തീരുമാനം വന്നത്.

ജോലിയില്‍നിന്ന് രാജിവെക്കുമ്പോഴോ മറ്റ് കാരണങ്ങളാലോ പെന്‍ഷനാകുന്നതിന് മുമ്പ് നിക്ഷേപം മുഴുവന്‍ പിന്‍വലിക്കാന്‍ അനുവാദം ഉണ്ടായിരുന്നു. എന്നാല്‍ ഇപ്പോള്‍ കാലാവധിയെത്തുന്നതിന് മുമ്പ് പിന്‍വലിക്കാവുന്ന തുക 75 ശതമാനമായി ചുരുക്കാനാണ് പുതിയ തീരുമാനം. തൊഴിലാളികളുടെ വയസ്സുകാലത്തെ സുരക്ഷ പരിഗണിച്ചാണ് കേന്ദ്രസര്‍ക്കാര്‍ പുതിയ രീതി കൊണ്ടുവന്നത്.

പുതിയ ശുപാര്‍ശയനുസരിച്ച് അമ്പത്തിനാല് വയസുകഴിഞ്ഞാല്‍ പിന്നെ തുക പിന്‍വലിക്കാനാകില്ല. തുക പിന്‍വലിക്കണമെങ്കില്‍ പിന്നീട് അമ്പത്തിയേഴ് വയസ് എത്തുന്നത് വരെ കാത്തിരിക്കേണ്ടി വരും.

നേരത്തെയുണ്ടായിരുന്ന നിയമപ്രകാരം ഉപഭോക്താക്കള്‍ക്ക് തങ്ങളുടെ നിക്ഷേപത്തിന്റെ 90 ശതമാനവും അമ്പത്തിനാല് വയസോടെ പിന്‍വലിക്കാനാകുമായിരുന്നു. പിന്നീടുളള പത്ത് ശതമാനം തുക വിരമിക്കലിന് തൊട്ടുമുമ്പുളള വര്‍ഷവും പിന്‍വലിക്കാനുളള സൗകര്യം ലഭിച്ചിരുന്നു. വിരമിക്കല്‍ പ്രായം അമ്പത്തിയഞ്ചും അമ്പത്തിയാറുമായിരുന്ന ഘട്ടത്തില്‍ ഈ നിയമത്തിന് പ്രാധാന്യം ഉണ്ടായിരുന്നുവെന്നാണ് അധികൃതരുടെ പക്ഷം. എല്ലാ സ്ഥാപനങ്ങളിലും ഇപ്പോള്‍ വിരമിക്കല്‍ പ്രായം അമ്പത്തിയെട്ടാണ്. അത് കൊണ്ട് തന്നെ ഈ നിയമത്തിന് ഇപ്പോള്‍ സാധുതയില്ല.

ഇതോടെ വീട് പണിയുന്നതിനോ ചികിത്സയ്ക്കോ, കുട്ടികളുടെ ഉന്നത വിദ്യാഭ്യാസം, വിവാഹം തുടങ്ങിയവയ്ക്കോ പണം പിന്‍വലിക്കുന്നതിന് നിയന്ത്രണം വരും എന്നതാണ് കടുത്ത പ്രതിഷേധങ്ങള്‍ക്ക് കാരണം. മൊത്തം തുകയുടെ 75 ശതമാനം മാത്രമേ ഇത്തരം ആവശ്യങ്ങള്‍ക്കായി പിന്‍വലിക്കാന്‍ സാധിക്കൂ.

57 വയസായ ശേഷമേ വരിഷ്ഠ പെന്‍ഷന്‍ പദ്ധതിയിലേക്ക് പിഎഫ് തുക മാറ്റാനും സാധിക്കൂ. നേരത്തെ ഇത് അമ്പത്തഞ്ചു വയസായിരുന്നു. ഇടപാടുകാര്‍ക്ക് തൊഴിലുടമയുടെ സാക്ഷ്യപത്രമില്ലാതെ തന്നെ പിഎഫ് തുക പിന്‍വലിക്കാനാകും.