സേവിങ്‌സ് അക്കൗണ്ടില്‍ ഇനി നെഗറ്റീവ് ബാലന്‍സ് വരില്ല. സേവിങ്സ് ബാങ്ക് അക്കൗണ്ടിലെ ബാലന്‍സ് പൂജ്യമായാല്‍ പിഴ ഈടാക്കുന്നത് നിര്‍ത്തണമെന്ന് ആര്‍ബിഐ ബാങ്കുകള്‍ക്ക് നിര്‍ദ്ദേശം നല്‍കി.മിനിമം ബാലന്‍സ് ഇല്ലാത്തതിന്റെ പേരില്‍ പിഴ ഈടാക്കി അക്കൗണ്ടിലെ പണം മുഴുവന്‍ തീര്‍ന്നതിന് ശേഷം വീണ്ടും പിഴ ഈടാക്കരുതെന്നാണ് നിര്‍ദേശം.

നേരത്തെ അക്കൗണ്ട് നെഗറ്റീവ് ബാലന്‍സിലേക്ക് പോകുന്ന തരത്തിലായിരുന്നു ക്രമീകരണം. അതായത് പിന്നീട് അക്കൗണ്ടില്‍ പണം വരുമ്പോള്‍ തുക മുഴുവനായി ഈടാക്കുകയും ചെയ്യും.

ബാങ്കുകള്‍ നെഗറ്റീവ് ബാലന്‍സ് രേഖപ്പെടുത്തി അക്കൗണ്ടില്‍നിന്ന് തുക ഈടാക്കിയാല്‍ ബാങ്കിങ് ഓംബുഡ്സമാനെ സമീപിക്കണമെന്ന് ഉപഭോക്താക്കള്‍ക്ക് ആര്‍ബിഐ നിര്‍ദേശം നല്‍കിയിട്ടുണ്ട്. പുതിയ നിര്‍ദ്ദേശത്തോടെ ഇനി ജോലി മാറുമ്പോഴും മറ്റും സാലറി അക്കൗണ്ടില്‍ മിനിമം ബാലന്‍സ് ഇല്ലാത്തതിന് പിഴ ഈടാക്കുന്ന പ്രവണത കുറയും.