കൊച്ചി: ഓട്ടോറിക്ഷക്കാര്‍ക്കും മറ്റ് സ്വയംതൊഴില്‍ ചെയ്യുന്ന തൊഴിലാളികള്‍ക്കും ഇഎസ്‌ഐ ആനുകൂല്യങ്ങള്‍ നല്‍കാനുള്ള പ്രവര്‍ത്തനങ്ങള്‍ ആരംഭിച്ചു. മുന്‍പ് പത്ത് തൊഴിലാളികളെങ്കിലും ജോലി ചെയ്യുന്ന ഫാക്ടറികള്‍, വാണിജ്യ സ്ഥാപനങ്ങള്‍, ആശുപത്രികള്‍, വിദ്യാഭ്യാസ സ്ഥാപനങ്ങള്‍ എന്നിവയിലെ തൊഴിലാളികള്‍ക്കു മാത്രമായിരുന്നു ഇഎസ്‌ഐ ആനുകൂല്യങ്ങള്‍ ലഭ്യമായിരുന്നത്.

സ്വയംതൊഴിലില്‍ ഏര്‍പ്പെട്ടിട്ടുള്ള 60 വയസിന് താഴെയുള്ള ഏതു തൊഴിലാളിക്കും പദ്ധതിയില്‍ അംഗമാകാം.തൊഴിലാളികള്‍ തങ്ങളെയും കുടുംബാംഗങ്ങളെയും സംബന്ധിച്ച വിവരങ്ങളും ഫോട്ടോകളും ഓണ്‍ലൈനായി അപ്ലോഡ് ചെയ്തു രജിസ്റ്റര്‍ ചെയ്യണം. ഇതിനുശേഷം തൊഴിലാളിക്കും കുടുംബത്തിനും ചികിത്സാനുകൂല്യങ്ങള്‍ ലഭ്യമാക്കുന്ന തിരിച്ചറിയല്‍ കാര്‍ഡ് രജിസ്റ്ററിങ് ഓഫീസര്‍ നല്‍കും.

ആദ്യ ഘട്ടത്തില്‍, പദ്ധതിയില്‍ റജിസ്റ്റര്‍ ചെയ്യുന്നതിനു വേണ്ടി നല്‍കേണ്ടുന്ന ഫീസ് 1500 രൂപയാണ്. ആറു മാസം കഴിഞ്ഞാല്‍ മൂന്ന്ുമാസം കൂടുമ്പോള്‍ 750 രൂപ അടയ്ക്കണം. ഏപ്രില്‍ ഒന്നു മുതല്‍ പ്രാബല്യത്തില്‍ വന്ന ഈ പദ്ധതി ആദ്യ ഘട്ടത്തില്‍ പരീക്ഷണാടിസ്ഥാനത്തില്‍ പന്ത്രണ്ട് മാസത്തേക്കാണ് നടപ്പിലാക്കുക.

അംഗത്തിന്റെ പങ്കാളിക്കും പൂര്‍ണമായും തൊഴിലാളിയെ ആശ്രയിച്ച് കഴിയുന്ന 18 വയസിനു താഴെയുള്ള രണ്ട് കുട്ടികള്‍ക്കും സൗജന്യചികിത്സാനുകൂല്യം ലഭ്യമാകും.ആദ്യ മൂന്ന് മാസക്കാലം ഔട്ട്‌പേഷ്യന്റ് ട്രീറ്റ്‌മെന്റ് മാത്രമേ ലഭിക്കുകയുള്ളൂ.ഔട്ട്‌പേഷ്യന്റ് ചികിത്സാ ഇനത്തില്‍ ഒരു വര്‍ഷത്തേക്ക് സൗജന്യമായി ലഭിക്കുന്ന മരുന്നിന്റെ വില 1500 രൂപയായി നിജപ്പെടുത്തിയിട്ടുണ്ട്.