ന്യൂഡല്‍ഹി: സ്വകാര്യ വിമാനക്കമ്പനികള്‍ക്ക് പിന്നാലെ എയര്‍ ഇന്ത്യയില്‍നിന്നും യാത്രക്കാര്‍ക്ക് ഓഫര്‍. ആഭ്യന്തര യാത്രയ്തക്ക് 1499 രൂപ മുതല്‍ ടിക്കറ്റ് ലഭിക്കും.ജൂലൈ ഒന്ന് മുതല്‍ സെപ്തംബര്‍ 30 വരെയാണ് ഈ നിരക്കില്‍ യാത്ര ചെയ്യാനാകുക.

മറ്റു സീസണുകളെ അപേക്ഷിച്ച് ജൂലൈ-സെപ്തംബര്‍, ജനുവരി-മാര്‍ച്ച് സീസണ്‍ വിമാന യാത്രക്കാരുടെ എണ്ണത്തില്‍ കുറവ് വരുന്ന കാലമാണ്. ഇതു കണക്കിലെടുത്താണ് ഓഫ് സീസണില്‍ യാത്രക്കാരെ ആകര്‍ഷിക്കാന്‍ ഈ ഓഫര്‍ പ്രഖ്യാപിച്ചത്.

'സൂപ്പര്‍ സെയില്‍ ഓഫറി'നായി ഇന്നുമുതല്‍ മെയ് 25 വരെ ബുക്ക് ചെയ്യാം.എയര്‍ ഇന്ത്യ വെബ്സൈറ്റ് വഴിയോ ട്രാവല്‍ ഏജന്‍സികള്‍ മുഖേനയോ ടിക്കറ്റ് ബുക്ക് ചെയ്യാം. ഇന്ത്യയുടെ തെക്ക്കിഴക്കന്‍ മേഖലകള്‍, ലഡാക്ക്, ആന്‍ഡമാന്‍ നിക്കോബാര്‍ ദ്വീപുകള്‍ തുടങ്ങി രാജ്യത്തുടനീളം 50ഓളം പ്രദേശങ്ങളിലേക്ക് എയര്‍ ഇന്ത്യ സര്‍വീസ് നടത്തുന്നുണ്ട്.

കഴിഞ്ഞ ആഴ്ച്ച സ്പൈസ്ജെറ്റ്, ഇന്‍ഡിഗോ, എയര്‍ ഏഷ്യ എന്നീ കമ്പനികള്‍ വമ്പന്‍ ഓഫറുകളുമായി രംഗത്തെത്തിയിരുന്നു.സ്പൈസ് ജെറ്റ് 511 രൂപയുടെയും ഇന്‍ഡിഗോ 800 രൂപയുടെയും ഓഫറുകളാണ് പ്രഖ്യാപിച്ചിരുന്നത്. എയര്‍ ഏഷ്യ പല റൂട്ടുകളിലും യാത്രാനിരക്ക് പകുതിയാക്കി കുറച്ചിരുന്നു.