ന്യൂഡല്‍ഹി: അമേരിക്കന്‍ കമ്പനിയായ ആമസോണ്‍, ഉല്‍പ്പന്ന നിര്‍മ്മാതാക്കളില്‍ നിന്നീടാക്കുന്ന കമ്മീഷന്‍ വെട്ടിക്കുറച്ചു. വരുമാന വര്‍ദ്ധന ലക്ഷ്യമിട്ട് ഇന്ത്യന്‍ കമ്പനികളായ ഫ്‌ളിപ്കാര്‍ട്ടും സ്‌നാപ്ഡീലും ഈ മാസം ആദ്യത്തില്‍ കമ്മിഷന്‍ കൂട്ടിയിരുന്നു. ഇതിനെതിരെ ഉല്‍പന്ന നിര്‍മ്മാതാക്കള്‍ പ്രതിഷേധം ഉയര്‍ത്തിയ സാഹചര്യത്തിലാണ് അവസരം മുതലെടുക്കാനായി ആമസോണ്‍ കമ്മിഷന്‍ കുറച്ചത്.

ഈ മാസം ആദ്യമാണ് കമ്മിഷന്‍ കൂട്ടുന്നതായും വിറ്റഴിഞ്ഞ ഉല്‍പ്പന്നങ്ങള്‍ തിരിച്ചെടുക്കാനുള്ള കാലപരിധി 30 ദിവസത്തില്‍ നിന്ന് പത്തു ദിവസമായി കുറയ്ക്കുന്നു എന്നറിയിച്ചും ഫ്‌ളിപ്കാര്‍ട്ട് ഉല്‍പ്പന്ന നിര്‍മ്മാതാക്കള്‍ക്ക് കത്തയച്ചത്. രണ്ടര മുതല്‍ മൂന്നു ശതമാനം വരെയാണ് സ്‌നാപ്ഡീലും ഫ്‌ളിപ്കാര്‍ട്ടും കമ്മീഷന്‍ കൂട്ടിയത്.

ഇലക്‌ട്രോണിക്‌സ് ഉല്‍പ്പന്നങ്ങളുടെ കമ്മിഷന്‍ മൂന്നു ശതമാനത്തിലേക്കും പഠനാവശ്യങ്ങള്‍ക്കും മറ്റുമുള്ള സോഫ്റ്റ്‌വെയറിന്റെ കമ്മിഷന്‍ 12 ശതമാനത്തില്‍ നിന്ന് അഞ്ച് ശതമാനത്തിലേക്കുമാണ് ആമസോണ്‍ കുറച്ചിരിക്കുന്നത്.വ്യാപാരികള്‍ ഈ ആനുകൂല്യം ഉപഭോക്താക്കള്‍ക്കും നല്‍കാന്‍ തയ്യാറായാല്‍ കൂടുതല്‍ വിലക്കുറവില്‍ സാധനങ്ങള്‍ ലഭ്യമാക്കാനും കഴിയും.

കൂടിയ പ്രവര്‍ത്തനച്ചിലവും വാരിക്കോരി നല്‍കിയ ഡിസ്‌കൗണ്ടുകളും ഇ-കൊമേഴ്‌സ് രംഗത്ത് കമ്പനികളുടെ വരുമാനം കുറച്ചിരുന്നു. ആമസോണ്‍, ഫ്‌ളിപ്കാര്‍ട്ട്, സ്‌നാപ്ഡീല്‍ എന്നിവയുടെ 2015ലെ സംയുക്ത വരുമാന നഷ്ടം 7,000 കോടി രൂപയാണ്.

ഫ്‌ളിപ്കാര്‍ട്ട് നിരക്ക് കൂട്ടി മൂന്ന് ദിവസം കഴിഞ്ഞപ്പോഴാണ് ആമസോണിന്റെ നിരക്ക് കുറയ്ക്കാനുള്ള തീരുമാനം പുറത്തുവന്നത്. ഇന്ത്യയിലെ ബിസിനസ് മെച്ചപ്പെടുത്തുന്നതിനായി മൂന്ന് ബില്യന്‍ ഡോളറാണ് ആമസോണ്‍ നീക്കിവെച്ചിരിക്കുന്നത്.