Click it and Unblock the Notifications
ന്യൂഡല്ഹി: സെപ്റ്റംബര് നാലിനു ശേഷം റിസര്വ് ബാങ്ക് ഗവര്ണര് സ്ഥാനത്ത് തുടരാനില്ലെന്ന് വ്യക്തമാക്കി രഘുറാം രാജന് സഹപ്രവര്ത്തകര്ക്ക് കത്തയച്ചു.
രണ്ടുമാസം കൂടി ഞാന് നിങ്ങളോടൊപ്പം ഉണ്ടാകും. എന്റെ പിന്ഗാമി ഇന്ത്യന് സമ്പദ്വ്യവസ്ഥയെ കൂടുതല് ഉയരങ്ങളിലേക്ക് നയിക്കുമെന്ന് എനിക്ക് പ്രതീക്ഷയുണ്ട്. ഇത്രകാലം നിങ്ങള്ക്കൊപ്പം നടത്തിയ യാത്ര മനോഹരമായിരുന്നു. എനിക്ക് നല്കിയ സ്നേഹത്തിനും ആത്മാര്ത്ഥത നിറഞ്ഞ സേവനങ്ങള്ക്കും റിസര്വ് ബാങ്ക് കുടുംബത്തോട് ഞാനെന്റെ നന്ദി അറിയിക്കുകയാണ് '', കത്തില് രാജന് പറഞ്ഞു.
താന് ചുമതലയേല്ക്കുമ്പോള് നാണ്യപ്പെരുപ്പം വലിയ ഉയരത്തിലായിരുന്നു. ഇതു പിടിച്ചുനിര്ത്താന് കഴിഞ്ഞു. പലിശ നിരക്കുകളില് 150 ബേസിസ് പോയിന്റിന്റെ കുറവു വരുത്തി. ആസ്ഥി മൂല്യ നിര്ണയം വഴി ബാങ്കുകളുടെ ബാലന്സ് ഷീറ്റുകള് ശക്തിപ്പെടുത്തി. ഇന്ത്യന് സമ്പദ്വ്യവസ്ഥ ശക്തിപ്പെടുത്തുന്നതിനു തന്റെ പിന്ഗാമിക്കും ഏറെ കാര്യങ്ങള് ചെയ്യാനുണ്ടെന്നും അദ്ദേഹം പറയുന്നു.
ഐ.എം.എഫിന്റെ ചീഫ് എക്കണോമിസ്റ്റും പ്രമുഖ സാമ്പത്തിക വിദഗ്ദ്ധനുമായിരുന്ന രഘുറാം രാജന് 2013ലാണ് റിസര്വ് ബാങ്ക് ഗവര്ണറായി നിയമിതനായത്. മൂന്നു വര്ഷമാണ് പദവിയുടെ കാലാവധി. രാജന്റെ കാലാവധി നീട്ടി നല്കരുതെന്ന് ആവശ്യപ്പെട്ട് ബി.ജെ.പി നേതാവ് സുബ്രഹ്മണ്യം സ്വാമി പ്രധാനമന്ത്രി നരേന്ദ്ര മോദിയ്ക്ക് കത്തു നല്കിയിരുന്നു. രാജനെ അനുകൂലിച്ചും പ്രതികൂലിച്ചും വാദപ്രതിവാദങ്ങള് തുടരുന്നതിനിടെയാണ് തത്സ്ഥാനത്ത് തുടരാനില്ലെന്ന് കാട്ടി രാജന് കത്തെഴുതിയത്.
Sign in with Google