ന്യൂഡല്‍ഹി: എയര്‍ടെല്ലിനെ പിന്തള്ളി ബിഎസ്എന്‍എല്‍ ഒന്നാമത്. ഏപ്രിലില്‍ ഏറ്റവുമധികം മൊബൈല്‍ ഫോണ്‍ വരിക്കാരെ സ്വന്തമാക്കിയ ടെലകോം കമ്പനിയെന്ന റെക്കോഡ് പൊതുമേഖലാ സ്ഥാപനമായ ബി.എസ്.എന്‍.എല്‍ സ്വന്തമാക്കി.മാര്‍ക്കറ്റ് ലീഡറായ ഭാരതി എയര്‍ടെലിനെ രണ്ടാംസ്ഥാനത്തേക്ക് പിന്തള്ളിയാണ് ബി.എസ്.എന്‍.എലിന്റെ ഈ നേട്ടം.

ഏപ്രിലില്‍ പുതുതായി 11.4 ലക്ഷം വരിക്കാരെ ബി.എസ്.എന്‍.എലിനു ലഭിച്ചു. ഭാരതി എയര്‍ടെലില്‍ പുതുതായി കൂട്ടിച്ചേര്‍ത്തത് 9.78 ലക്ഷം പേരെയാണ്. വിപണി വിഹിതത്തില്‍ എയര്‍ടെലിനു പിറകില്‍ രണ്ടാംസ്ഥാനത്ത് വൊഡാഫോണാണ്.വെഡാഫോണിന് ഏപ്രിലില്‍ 46,660 പുതിയ വരിക്കാരെയാണ് കിട്ടിയത്. മൂന്നാമത്തെ വലിയ കമ്പനിയായ ഐഡിയ 3.87 ലക്ഷം പേരെ പുതുതായി ചേര്‍ത്തു.

ഇന്ത്യയിലെ മൊത്തം വയര്‍ലെസ് ഫോണ്‍ വരിക്കാരുടെ എണ്ണം ഏപ്രിലില്‍ 103.36 കോടിയിലെത്തി. മാര്‍ച്ചില്‍ ഇത് 103.42 കോടിയായിരുന്നു. ലാന്‍ഡ് ഫോണ്‍ വരിക്കാരുടെ എണ്ണം 2.53 കോടിയില്‍ നിന്ന് 2.50 കോടിയായി കുറഞ്ഞു.

ഇന്ത്യന്‍ മൊബൈല്‍ ഫോണ്‍ സേവന രംഗത്ത് 91.20 വിപണി വിഹിതവും കൈയാളുന്ന സ്വകാര്യ കമ്പനികളെ പിന്നിലാക്കിയായിരുന്നു ഏപ്രിലില്‍ ബി.എസ്.എന്‍.എല്‍ ഒന്നാമത്. പൊതമേഖലാ സ്ഥാപനമായ ബി.എസ്.എന്‍.എലിനും എം.ടി.എന്‍.എലിനും കൂടിയുള്ള മാര്‍ക്കറ്റ് വിഹിതം 8.80 ശതമാനം മാത്രമാണ്. ഏപ്രിലില്‍ ബ്രോഡ്ബാന്‍ഡ് വരിക്കാരുടെ എണ്ണം 14.97 കോടിയില്‍ നിന്ന് 15.10 കോടിയിലെത്തി.