ന്യൂഡല്‍ഹി: മാഗിയെ പുറത്താക്കി വിപണി പിടിച്ച പതഞ്ജലിക്കെതിരെ നെസ്‌ലെയുടെ പുതിയ നീക്കം.
മാഗി നൂഡില്‍സില്‍നിന്നേറ്റ തിരിച്ചടി മറികടക്കാന്‍ വിവിധ വിഭാഗങ്ങളിലായി 25 പുതിയ ഉത്പന്നങ്ങള്‍ വിപണിയിലിറക്കാനാണ് നെസ്‌ലെയുടെ ലക്ഷ്യം.

മാഗി നൂഡില്‍സിന്റെ ഏഴു വെറൈറ്റികളും ഗ്രീക്ക് യോഗര്‍ട്ട് ബ്രാന്‍ഡ് ഗ്രക്യോ, പാലുത്പന്നരംഗത്ത് പ്രോട്ടീന്‍ ഗ്രോത്ത് ബ്രാന്‍ഡ് പ്രോ-ഗ്രോ, വിവിധ ഇനം ചോക്ലേറ്റുകള്‍, ചായയിലും കാപ്പിയിലും പുതിയ ഉത്പന്നങ്ങള്‍ എന്നിവയാണ് പുതുതായി അവതരിപ്പിക്കുക. ഇപ്പോഴുള്ള ഉത്പങ്ങളെ പുനരുജ്ജീവിപ്പിക്കുന്നതിനൊപ്പം കുട്ടികളെയും യുവാക്കളെയും മുതിര്‍ന്നവരെയും ലക്ഷ്യമിട്ടാണ് പുതിയ ഉത്പന്നങ്ങള്‍ ഇറക്കുന്നത്.

നൂഡില്‍സില്‍ 55.5 ശതമാനം വിപണിയാണ് നെസ്‌ലെയ്ക്ക് രാജ്യത്തുള്ളത്. നിരോധനത്തിനു മുമ്പ് ഇത് 77 ശതമാനമായിരുന്നു. മാഗിക്കെതിരേ വിവാദങ്ങളുയര്‍ന്നതോടെ 500 കോടിയലധികം നഷ്ടമുണ്ടായിരുന്നു. ഇതു തിരിച്ചുപിടിക്കാന്‍ ഇനിയും മാസങ്ങള്‍ വേണ്ടിവരുമെന്ന് കമ്പനി അറിയിച്ചു.

ഇന്‍സ്റ്റന്റ് നൂഡില്‍സിന് ഏകദേശം 2,000 കോടിയുടെ മാര്‍ക്കറ്റാണ് ഇന്ത്യയിലുള്ളത്. മാഗിയെക്കൂടാതെ ഐടിസിയുടെ യിപ്പീ, നേപ്പാളില്‍നിന്നുള്ള ചൗധരി ഗ്രൂപ്പിന്റെ വായ് വായ്, പതഞ്ജലി നൂഡില്‍സ് എന്നിവയാണ് ഇന്ത്യന്‍ മാര്‍ക്കറ്റിലെ പ്രധാനികള്‍.