കൊച്ചി: രാജ്യാന്തര വിപണിയിലെ വ്യതിയാനങ്ങള്‍ ഇന്ത്യയിലും സ്വര്‍ണവിലയെ ബാധിക്കുന്നു. അന്താരാഷ്ട്ര സ്വര്‍ണ മാര്‍ക്കറ്റിലെ ബുള്‍ തരംഗം ഇന്ത്യന്‍ മാര്‍ക്കറ്റില്‍ തങ്കത്തിന്റെ തിളക്കം വര്‍ധിപ്പിച്ചു.

രാജ്യാന്തര തലത്തില്‍ സ്വര്‍ണവില അഞ്ചു ശതമാനം ഉയര്‍ന്നതും രൂപയുടെ മൂല്യത്തകര്‍ച്ചയും സ്വര്‍ണ ഇറക്കുമതിച്ചെലവ് ഉയര്‍ത്തി. കേരളത്തില്‍ പവന്‍ 22,160 രൂപയില്‍നിന്ന് 21,920ലേക്ക് താഴ്ന്ന ശേഷം വെള്ളി,ശനി ദിവസങ്ങളോടെ മൊത്തം 720 രൂപ ഉയര്‍ന്ന് 22,640 രൂപയായി. ഇതോടെ ഒരു ഗ്രാം സ്വര്‍ണത്തിന്റെ വില 2,830 രൂപയായി.

പത്തുഗ്രാം തങ്കം 30,900 രൂപയാണ് വില.ന്യൂയോര്‍ക്കില്‍ ട്രോയ് ഔണ്‍സ് സ്വര്‍ണം മൂന്നു വര്‍ഷത്തെ മികച്ച നിലവാരത്തിലെത്തി. യൂറോപ്യന്‍ യൂണിയനില്‍നിന്നുള്ള ബ്രിട്ടന്റെ പിന്‍മാറ്റം പ്രമുഖ നാണയങ്ങളെ തളര്‍ത്തിയത് സ്വര്‍ണത്തിനു നേട്ടമായി.

ഔണ്‍സിന് 1,263 ഡോളറില്‍നിന്ന് 1344.60 വരെ മുന്നേറിയ സ്വര്‍ണം വ്യാപാരാന്ത്യം 1315 ഡോളറിലാണ്. യൂറോപ്യന്‍ യൂണിയനില്‍നിന്ന് കൂടുതല്‍ രാജ്യങ്ങള്‍ പുറത്തു പോകാനുള്ള സാധ്യതകള്‍ കണക്കിലെടുത്താല്‍ വരും വര്‍ഷങ്ങളില്‍ സ്വര്‍ണത്തിന്റെ തിളക്കം വര്‍ധിക്കാം. ഡെയ്‌ലി, വീക്കിലി ചാര്‍ട്ടുകളില്‍ സ്വര്‍ണം ബുള്ളിഷ് ട്രന്‍ഡിലേക്കു തിരിഞ്ഞത് വിലയിരുത്തിയാല്‍ 1,450 ഡോളറിലേക്ക് അധികം വൈകാതെയെത്തും. ഫോറെക്‌സ് മാര്‍ക്കറ്റിലെ ചാഞ്ചാട്ടം സ്വര്‍ണത്തിന്റെ മുന്നേറ്റത്തിനു വേഗത കൂട്ടും.