ന്യൂഡല്‍ഹി: ആഭ്യന്തര സര്‍വീസുകളില്‍ 786 രൂപയില്‍ ആരംഭിക്കുന്ന ഓഫര്‍ എയര്‍ ഏഷ്യ പ്രഖ്യാപിച്ചു. രജനീകാന്ത് ചിത്രം കബാലിയുടെ പ്രൊമോഷനായി സംഘടിപ്പിക്കുന്ന ' ഫ്ളൈ ലൈക്ക് എ സൂപ്പര്‍ സ്റ്റാര്‍' എന്ന ഓഫര്‍ പ്രകാരം ജൂലൈ 3 വരെ ടിക്കറ്റുകള്‍ ബുക്ക് ചെയ്യാം.

എയര്‍ ഏഷ്യയുടെ വെബ് സൈറ്റോ എയര്‍ഏഷ്യ മൊബൈല്‍ ആപ് വഴിയോ ടിക്കറ്റുകള്‍ ബുക്ക് ചെയ്യാനാകും. ബെംഗളൂരു, ഡല്‍ഹി എന്നിവടങ്ങളില്‍ നിന്ന് 2017 ഫെബ്രുവരി 1- ഏപ്രില്‍ 30 വരെയാണ് യാത്ര ചെയ്യാന്‍ കഴിയുക.

നേരത്തെ കബാലിയുടെ സൗജന്യ ടിക്കറ്റുകള്‍ നല്‍കുന്ന ഓഫറും എയര്‍ ഏഷ്യ പ്രഖ്യാപിച്ചിരുന്നു.
കബാലിയുടെ റിലീസ് ദിനത്തില്‍ ബെംഗളൂരുവില്‍ നിന്നും ചെന്നൈയിലേക്ക് യാത്ര ചെയ്യുന്ന യാത്രക്കാര്‍ക്ക് ചിത്രം കാണാനുള്ള സൗകര്യം ഒരുക്കുകയാണ് എയര്‍ ഏഷ്യയുടെ ഓഫര്‍.ഈ സ്‌പെഷല്‍ പാക്കേജിന് 7860 രൂപയാണ് ചാര്‍ജ്. കബാലിയുടെ സിനിമാ ടിക്കറ്റ്, ഭക്ഷണം, തിരിച്ചുവരാനുള്ള ടിക്കറ്റ്, ഓഡിയോ സിഡി എന്നിവ ഉള്‍പ്പെടെയാണ് ഈ തുക.

കബാലിയുടെ ഒഫീഷ്യല്‍ എയര്‍ലൈന്‍ പാര്‍ട്‌നറാണ് എയര്‍ഏഷ്യ.ജൂലൈ 15നാണ് കബാലി റിലീസ് ചെയ്യുന്നത്.