വാഹന വിപണിയില്‍ എസ്യുവി ശ്രേണിയില്‍ താരമാവാന്‍ യു വി സെഗ്മെന്റിലെ മുന്‍നിര നിര്‍മാതാക്കളായ ടൊയോട്ട. ഇന്ത്യന്‍ വിപണിയിലേക്കായി കോംപാക്റ്റ് എസ്യുവി റഷ് ആയിരിക്കും 2018ഓടെ ടൊയോട്ട പുറത്തിറക്കുക എന്നാണ് റിപ്പോര്‍ട്ടുകള്‍.

ജാപ്പനീസ്, മലേഷ്യന്‍, ഇന്തോനേഷ്യന്‍ വിപണികളില്‍ ടൊയോട്ടയുടെ ബഡ്ജെറ്റ് ബ്രാന്‍ഡായ ദെയ്ഹാറ്റ്സുവിന്റെ ലേബലിലാണു റഷ് പുറത്തിറങ്ങുന്നത്.പെട്രോളിലും ഡീസലിലും ഓടുന്ന വലിപ്പമുള്ള കോംപാക്റ്റ് എസ്യുവിയായിരിക്കും റഷ്. നാലു മീറ്ററില്‍ കുറയാത്ത വലിപ്പമുണ്ടായിരിക്കും റഷിന്.

ഇന്ത്യയില്‍ മാരുതി എസ് ക്രോസ്, റെനോ ഡസ്റ്റര്‍, ഹ്യുണ്ടേയ് ക്രേറ്റ തുടങ്ങിയ വാഹനങ്ങളമായി മത്സരിക്കാനെത്തുന്ന റഷിന് 8 ലക്ഷം മുതലായിരിക്കും വില എന്നാണ് പ്രതീക്ഷിക്കുന്നത്. നിലവില്‍ മലേഷ്യന്‍ മാര്‍ക്കറ്റിലുള്ള റഷിന് 1.4 ലിറ്റര്‍ ഡീസല്‍ എന്‍ജിനും 1.5 ലിറ്റര്‍ പെട്രോള്‍ എന്‍ജിനുമാണുള്ളത്.

ഏഴു പേര്‍ക്ക് യാത്ര ചെയ്യാന്‍ സാധിക്കും റഷില്‍. രാജ്യത്തു പലഭാഗങ്ങളിലും 2000 സിസിയില്‍ അധികം വലിപ്പമുള്ള ഡീസല്‍ എന്‍ജിനുകള്‍ക്ക് വിലക്ക് ഏര്‍പ്പെടുത്തിയ സാഹചര്യത്തില്‍ ഇന്ത്യയിലെ പ്രവര്‍ത്തനങ്ങള്‍ പുനഃപരിശോധിക്കാന്‍ ടൊയോട്ട മോട്ടോര്‍ കോര്‍പറേഷന്‍ ആലോചിക്കുന്നുമുണ്ട്.