മുംബൈ: അമേരിക്കന്‍ വാഹനനിര്‍മ്മാതാക്കളായ ഫോഡിന്റെ ലോക പ്രശസ്ത മസില്‍ കാര്‍ മസ്താങ് ജിടി ജൂലായ് 13ന് ഇന്ത്യന്‍ വിപണിയിലെത്തുന്നു. നിരത്തിലെത്തി അര നൂറ്റാണ്ട് പിന്നിടുന്ന വേളയിലാണു മസ്താങ് ഇന്ത്യന്‍ നിരത്തുകളിലേക്കെത്തുന്നത്..

1965ല്‍ പുറത്തിറക്കിയ മസ്താങ്ങിന്റെ ആറാം തലമുറയില്‍പ്പെട്ട വാഹനമാണിത്.കഴിഞ്ഞ ആഗസ്തിലാണ് മസ്താങ്ങ് കമ്പനി അവതരിപ്പിച്ചത്. 6 സ്പീഡ് ഓട്ടോമാറ്റിക് ട്രാന്‍സ്മിഷനില്‍ 5 ലിറ്റര്‍ വി 8 എഞ്ചിനുമായെത്തുന്ന കാറിന്റെ പരമാവധി കരുത്ത് 435 ബിഎച്ച്പിയും, 542 എന്‍ എം ടോര്‍ക്കുമാണുള്ളത്.

കറുപ്പ് മള്‍ട്ടി സ്പോക്ക് അലോയ് വീല്‍, വൈപ്പര്‍ ആക്ടിവേഷന്‍ സംവിധാനമുള്ള ഓട്ടോമാറ്റിക് എച്ച്ഐഡി ഹെഡ്ലാമ്പ്, എല്‍ഇഡി ടെയില്‍ ഫോഗ് ലാമ്പുകള്‍, ഫിറ്റഡ് ഇരട്ട ഡോര്‍ മിററുമാണ് പ്രധാന സവിശേഷതകള്‍. 4 സെക്കണ്ടിനുള്ളില്‍ 100 കിലോമീറ്റ്ര്‍ സ്പീഡില്‍ ഓടിക്കയറുന്ന മസ്താങ്ങ് 3 സെക്കണ്ടിനുള്ളില്‍ ബ്രേക്കിംഗ് സാധ്യമാക്കുന്നു. ഡ്യുവല്‍ സോണ്‍ കാലാവസ്ഥ കണ്‍ട്രോള്‍, നാലു ഗേജ് ഇന്‍സ്ട്രമെന്റ് ക്ലസ്റ്റര്‍, മള്‍ട്ടി വര്‍ക്ക്ഫുള്‍ സ്റ്റിയറിംങ് എന്നീ സംവിധാനങ്ങളും കാറിലുണ്ടാകും.

വിദേശനിര്‍മ്മിതമായ മസ്താങ്ങ് ജിടി ഇറക്കുമതി ചെയ്താണ് വില്‍പനക്കെത്തിക്കുക. വില ഇതുവരെ പ്രഖ്യാപിച്ചിട്ടില്ല.ഇറക്കുമതി ചുങ്കവും മറ്റും ചേരുന്നതോടെ ഇന്ത്യയില്‍ മസ്താങ്ങിന്റെ വില 60 മുതല്‍ 70 ലക്ഷം രൂപയോളമായിരിക്കുമെന്നാണു വിലയിരുത്തല്‍.