കൊച്ചി: പുതിയ സര്‍ക്കാരിന്റെ ആദ്യ ബജറ്റ് ജൂലൈ എട്ടിന് ധനമന്ത്രി തോമസ് ഐസക്ക് അവതരിപ്പിക്കും. സാമ്പത്തിക പ്രതിസന്ധി മറികടക്കാന്‍ ജനങ്ങളുടെ മേല്‍ ഭാരമേല്‍പ്പിക്കാതെ എങ്ങിനെ വരുമാനമുണ്ടാക്കും എന്നതാണ് എല്ലാവരും ഉറ്റുനോക്കുന്നത്.

കടുത്ത ധനപ്രതിസന്ധിയെ കുറിച്ച് ഒരാഴ്ച മുമ്പ് ധവളപത്രം ഇറക്കിയിരുന്നു. കടമെടുക്കാന്‍പോലും സാധിക്കാത്ത സ്ഥിതിയാണ് നിലവിലുള്ളത്. പുതിയ നികുതി ഏര്‍പ്പെടുത്താതെ വരുമാനം കൂട്ടലാണ് ധനമന്ത്രി തോമസ് ഐസക്കിനു മുന്നിലെ പ്രധാന വെല്ലുവിളി.

പദ്ധതിയേതര ചെലവ് വെട്ടിക്കുറയ്ക്കുമെന്നാണ് തോമസ് ഐസക്ക് പറയുന്നത്. നിത്യച്ചെലവിന് പോലും തികയാത്ത സ്ഥിതിയാണെന്ന് സര്‍ക്കാര്‍ വെളിപ്പെടുത്തുന്നു. വില്‍പനനികുതിയിലൂടെ വരുമാനം വര്‍ധിപ്പിക്കാനാണ് ബജറ്റിന്റെ പ്രധാന ലക്ഷ്യം.

20 ശതമാനം വരുമാനം കൂട്ടലാണു പ്രധാന ലക്ഷ്യം . പക്ഷേ അതിനായി മൂന്നു വര്‍ഷമെങ്കിലുമെടുക്കുമെന്ന് ധനമന്ത്രി തന്നെ സൂചിപ്പിരുന്നു. നികുതി നിരക്കുകള്‍ കൂട്ടാതെ വരുമാനം വര്‍ധിപ്പിക്കാന്‍ ലക്ഷ്യമിടുന്ന ബജറ്റായിരിക്കും ധനമന്ത്രി തോമസ് ഐസക് അവതരിപ്പിക്കുക എന്ന് കരുതുന്നു.