മുംബൈ: വിവാദങ്ങള്‍ക്കൊടുവില്‍ ഏറ്റവും വിലകുറഞ്ഞ സ്മാര്‍ട്ഫോണ്‍ ഫ്രീഡം 251 ഉപഭോക്താക്കളിലേക്കെത്തുന്നു. 930 രൂപയുടെ നഷ്ടം ഓരോ ഫോണിന്മേലും തങ്ങള്‍ക്കുണ്ടാവുന്നുണ്ടെന്നാണ് കമ്പനിയുടെ പക്ഷം.

ഫോണ്‍ ബുക്ക് ചെയ്തവര്‍ക്ക് അയച്ചു തുടങ്ങിയിട്ടുണ്ട്. എന്നാല്‍, ഇതുവരെ ഫോണ്‍ കിട്ടിയതായി റിപ്പോര്‍ട്ടുകളില്ലെന്ന് റിഗിംങ് ബെല്‍സ് സ്ഥാപകനും സി ഇ ഒയുമായ മോഹിത് ഗോയല്‍ പറഞ്ഞു.

5000 യൂണിറ്റ് ഫോണുകളാണ് ആദ്യഘട്ടത്തില്‍ ഉപഭോക്താക്കള്‍ക്ക് വിതരണം ചെയ്യുക. കാഷ് ഓണ്‍ ഡെലിവറിയായി അയക്കുന്ന ഫോണ്‍ സ്വീകരിക്കാന്‍ 290 രൂപയാണ് നല്‍കേണ്ടത്. ഫോണ്‍ വിലയായ 251 രൂപയ്ക്കുപുറമെ, 40 രൂപ ഷിപ്പിങ് നിരക്കാണ്.

ഫോണ്‍ പുറത്തിറക്കുന്നതിന്റെ ഭാഗമായി റിഗിംങ് ബെല്‍സ് കമ്പനി രാജ്യത്തുടനീളം 500ലധികം സര്‍വ്വീസ് സെന്ററുകളാണ് തുറക്കുന്നത്. ഫ്രീഡം 251ന് ഒരു വര്‍ഷത്തെ വാറന്റിയും ഉറപ്പു നല്കുന്നുണ്ട്.