മുംബൈ: ചൈനീസ് സ്മാര്‍ട്ട്‌ഫോണ്‍ നിര്‍മ്മാതാക്കളായ ഓപ്പോ രാജ്യാന്തര വിപണിയില്‍ നാലാം സ്ഥാനത്തെത്തി. ഈ സാമ്പത്തിക വര്‍ഷത്തിലെ ആദ്യപാദത്തിലെ കണക്കുകളനുസരിച്ച് 153 ശതമാനത്തിന്റെ വളര്‍ച്ചയാണ് ഓപ്പോ രേഖപ്പെടുത്തിയത്.

നിലവില്‍ വിപണിയില്‍ ഒന്നാം സ്ഥാനത്ത് സാംസങ് തന്നെയാണ്. രണ്ടാം സ്ഥാനത്ത് ആപ്പിള്‍, മൂന്നാം സ്ഥാനത്ത് ഹ്യുവായ്, അഞ്ചാമത് വിവോ എന്നിങ്ങനെയാണ് പട്ടിക. ഐ.ഡി.സിയുടെ കണക്കുകള്‍ പ്രകാരം ഇത് ആദ്യമായാണ് ഓപ്പോ രാജ്യാന്തര സ്മാര്‍ട്ട്ഫോണ്‍ വിപണിയില്‍ ആദ്യ അഞ്ചില്‍ ഇടംനേടുന്നത്.

ഈ വര്‍ഷം ആദ്യപാദത്തില്‍ കമ്പനി വിറ്റത് 18.5 ദശലക്ഷം യൂണിറ്റ് ഫോണുകളാണ്. കഴിഞ്ഞ വര്‍ഷം ഇക്കാലയളവില്‍ കമ്പനിയുടെ വില്‍പന 7.3 ദശലക്ഷം ഹാന്‍ഡ്സെറ്റുകളായിരുന്നു.

2016 ലെ ആദ്യപാദത്തില്‍ രണ്ടു പുതിയ ഹാന്‍ഡ്സെറ്റുകള്‍ ഓപ്പോ പുറത്തിറക്കി. ഫോട്ടോഗ്രാഫിക്ക് പ്രാധാന്യം നല്‍കിയുള്ളതായിരുന്നു രണ്ട് ഹാന്‍ഡ്സെറ്റുകളും. എഫ്1, എഫ്1 പ്ലസ് ഹാന്‍ഡ്സെറ്റുകള്‍ക്ക് വിപണിയില്‍ നല്ല അഭിപ്രായം ലഭിച്ചിരുന്നു.