മുംബൈ: മുകേഷ് അംബാനിയുടെ നേതൃത്വത്തിലുളള റിലയന്‍സ് ജിയോയുടെ ഫോര്‍ ജി സേവനം സ്വാതന്ത്ര്യദിനത്തില്‍ ആരംഭിക്കാനിരിക്കെ ഹാപ്പി അവേഴ്സ് എന്ന പേരില്‍ മൊബൈല്‍ ഉപഭോക്താക്കളെ ആകര്‍ഷിക്കാന്‍ പുതിയ ഡാറ്റാ പ്ലാനുമായി ഭാരതി എയര്‍ടെല്‍ രംഗത്ത്. ഇതോടെ ടെലികോം സേവനരംഗത്ത് മത്സരം മുറുകുമെന്നുറപ്പായി.

നിശ്ചിതസമയത്ത് വീഡിയോ ഡൗണ്‍ലോഡ് ചെയ്യുന്ന പ്രീപെയ്ഡ് ഉപഭോക്താക്കള്‍ക്ക് ഉപയോഗിച്ച ഡാറ്റയുടെ പകുതി തിരിച്ചുനല്‍കുന്ന നിലയിലാണ് പദ്ധതി അവതരിപ്പിച്ചിരിക്കുന്നത്. പുലര്‍ച്ചെ മൂന്ന് മണി മുതല്‍ അഞ്ചുമണിവരെയുളള രണ്ടുമണിക്കൂര്‍ സമയം ഡൗണ്‍ലോഡ് ചെയ്യുന്നവര്‍ക്കാണ് പദ്ധതിയുടെ പ്രയോജനം ലഭിക്കുക.അതായത് നിര്‍ദിഷ്ട സമയത്ത് 100 എംബി വീഡിയോ ഡൗണ്‍ലോഡ് ചെയ്ത ഉപഭോക്താവിന് 50 എംബി തിരിച്ച് നല്‍കും

നിലവിലെ തങ്ങളുടെ ഉപഭോക്താക്കളെ അതേപോലെ നിലനിര്‍ത്തുന്നതിനൊടൊപ്പം പുതിയ ഉപഭോക്താക്കളെ ആകര്‍ഷിക്കാനും ലക്ഷ്യമിട്ടാണ് പുതിയ ഇളവ് കമ്പനി പ്രഖ്യാപിച്ചത്. പീക്ക് അവറിലെ ഡാറ്റാ ഉപയോഗം കുറച്ച് നെറ്റ്വര്‍ക്കിനെ കൂടുതല്‍ ആയാസമാക്കാനും ഈ പദ്ധതിയിലുടെ കമ്പനി ലക്ഷ്യമിടുന്നുണ്ട്.

ഫീഡം എന്ന പേരിലുളള റിലയന്‍സ് ജിയോ ഫോര്‍ ജി സേവനത്തിന് ആഗസ്റ്റിലാണ് തുടക്കമാവുക.സൗജന്യ വോയ്സ് കോളുകള്‍ക്കൊപ്പം ഇന്റര്‍നെറ്റ് ഡാറ്റ 25 ശതമാനം കുറഞ്ഞ നിരക്കില്‍ അവതരിപ്പിക്കാനാണ് ജിയോ പദ്ധതിയിടുന്നത്. 80 രൂപയ്ക്ക് ലഭിക്കുന്ന ഒരു ജിബി പായ്്ക്കിലാണ് സൗജന്യ വോയ്സ് കോള്‍ സൗകര്യം ലഭിക്കുക. പ്രമുഖ ടെലികോം കമ്പനികളെല്ലാം ഇതോടെ പുതിയ ഓഫറുകളുമായി വിപണി പിടിക്കാനെത്തും എന്നാണ് കരുതുന്നത്.