ചെന്നൈ: ഇരുചക്രവാഹന മേഖലയിലെ അമരക്കാരായ റോയല്‍ എന്‍ഫീല്‍ഡിന് ഈ വര്‍ഷം 6.75 ലക്ഷം ബൈക്കുകള്‍ വില്‍ക്കാനാവുമെന്ന് പ്രതീക്ഷ. മൂലധനത്തിനായി 2016-2017ല്‍ കമ്പനി 600 കോടി രൂപ ചെലവഴിക്കും, കഴിഞ്ഞ സാമ്പത്തിക വര്‍ഷം 500 കോടിയായിരുന്നു മൂലധനച്ചെലവെന്നും കമ്പനിയുടെ ഉടമസ്ഥരായ ഐഷര്‍ മോട്ടോഴ്സ് മാനേജിങ് ഡയറക്ടറും ചീഫ് എക്സിക്യൂട്ടീവ് ഓഫിസറുമായ സിദ്ധാര്‍ഥ ലാല്‍ അറിയിച്ചു.

'ബുള്ളറ്റ് ക്ലാസിക്' ശ്രേണിക്കു ലഭിച്ച മികച്ച വരവേല്‍പ്പിന്റെ അടിസ്ഥാനത്തിലാണ് 2016-2017ല്‍ 6.75 ലക്ഷം യൂണിറ്റെന്ന വില്‍പ്പനലക്ഷ്യം നിശ്ചയിച്ചത്. ഇക്കൊല്ലത്തെ ഉല്‍പ്പാദനം രണ്ടു ലക്ഷം യൂണിറ്റ് വര്‍ധിപ്പിച്ചാലേ ഇത് നേടാന്‍ കഴിയൂ.

ഇപ്പോള്‍ തിരുവൊട്ടിയൂരിലും ഒരഗടത്തുമാണു റോയല്‍ എന്‍ഫീല്‍ഡിന്റെ നിര്‍മ്മാണശാലകള്‍ പ്രവര്‍ത്തിക്കുന്നത്.വള്ളംവടഗലില്‍ സ്ഥാപിക്കുന്ന മൂന്നാമതു നിര്‍മ്മാണശാല 2017 സെപ്റ്റംബറോടെ പ്രവര്‍ത്തനക്ഷമമാവും.

പുതിയ ഫാക്ടറി പ്രവര്‍ത്തനം തുടങ്ങുന്നതോടെ 2018-2019ല്‍ കമ്പനിയുടെ വാര്‍ഷിക ഉല്‍പ്പാദനശേഷി 9 ലക്ഷം യൂണിറ്റായി ഉയരും. കഴിഞ്ഞ വര്‍ഷത്തെ കയറ്റുമതിയില്‍ 50% വളര്‍ച്ച കൈവരിക്കാന്‍ കമ്പനിക്കു കഴിഞ്ഞു.