കൊച്ചി: ചിങ്ങമാസം ആരംഭിക്കാനിരിക്കെ വിവാഹസീസണ് മുന്നോടിയായി സ്വര്‍ണവില വര്‍ധിച്ചു. പവന് 80 രൂപയാണ് കൂടിയത്. 2915 രൂപയാണ് ഒരു ഗ്രാം സ്വര്‍ണത്തിന് ചൊവ്വാഴ്ചത്തെ വില.

പവന് 23,320 രൂപ എന്ന നിലയിലാണ് വ്യാപാരം പുരോഗമിക്കുന്നത്. കഴിഞ്ഞ മൂന്ന് ദിവസമായി 23,240 രൂപയായിരുന്നു പവന് വില.

ചിങ്ങത്തിലെ വിവാഹ സീസണ്‍ മുന്നില്‍ കണ്ട് ഇടപാടുകാര്‍ ആഭരണ കേന്ദ്രങ്ങളില്‍ താത്പര്യം കാണിക്കുന്നുണ്ട്. പവന്റെ വില വീണ്ടും ഉയരുമെന്ന ആശങ്കയില്‍ വിവാഹ പാര്‍ട്ടികള്‍ ആദ്യം തന്നെ ബുക്ക് ചെയ്തതും സ്വര്‍ണത്തിന്റെ ഡിമാന്‍ഡ് ഉയരാന്‍ കാരണമായിട്ടുണ്ട്.

കഴിഞ്ഞ തിങ്കളാഴ്ച 22,960 രൂപയില്‍ വില്‍പന തുടങ്ങിയ പവന്‍ ആദ്യം 23,160ലേക്കും അവിടെനിന്ന് ശനിയാഴ്ച 23,240ലേക്കും ഉയര്‍ന്നു. ഒരു ഗ്രാമിന്റെ വില 2,905 രൂപയായിരുന്നു.