മുംബൈ: അനില്‍ അംബാനിയുടെ മൂത്ത മകന്‍ ജയ് അന്‍മോല്‍ റിലയന്‍സ് ക്യാപിറ്റലിന്റെ ഡയറക്ടര്‍ ബോര്‍ഡില്‍ അഡീഷണല്‍ ഡയറക്ടറായി ചുമതലയേല്‍ക്കും. ഇരുപത്തിനാലുകാരനായ അന്‍മോല്‍ രണ്ട് വര്‍ഷമായി റിലയന്‍സ് ക്യാപിറ്റലിന്റെ വിവിധ മേഖലകളില്‍ പ്രവര്‍ത്തിച്ചുവരികയായിരുന്നു.

അംബാനി കുടുംബത്തിലെ മൂന്നാം തലമുറയും ഇതോടെ കമ്പനി ബോര്‍ഡിലെത്തി. അടുത്ത മാസം നടക്കുന്ന വാര്‍ഷിക ജനറല്‍ മീറ്റിംഗില്‍ അന്‍മോല്‍ ഫുള്‍ടൈം എക്‌സിക്യൂട്ടിവ് ഡയറക്ടറായി ചുമതലയേല്‍ക്കും.

ബ്രിട്ടനിലെ വാര്‍വിക് ബിസിനസ് സ്‌കൂളില്‍നിന്നു ബിരുദമെടുത്ത അന്‍മോല്‍ റിലയന്‍സ് കാപ്പിറ്റലിന്റെ ഇന്‍ഷുറന്‍സ് ബിസിനസിലായിരുന്നു ശ്രദ്ധിച്ചിരുന്നത്.അനില്‍ അംബാനിയുടെ മൂത്ത സഹോദരന്‍ മുകേഷ് അംബാനിയുടെ മകന്‍ ആകാശ് റിലയന്‍സ് ഇന്‍ഡസ്ട്രീസില്‍ എക്‌സിക്യൂട്ടീവാണ്.

4,000 കോടി രൂപയുടെ വിറ്റുവരവുള്ള റിലയന്‍സ് ക്യാപിറ്റല്‍ ലൈഫ് ഇന്‍ഷുറന്‍സ്,കമേഴ്‌സ്യല്‍ ഫിനാന്‍സ്,സെക്യൂരിറ്റീസ്,ജനറല്‍ ഫിനാന്‍സ്, മ്യൂച്വല്‍ ഫണ്ട് എന്നിവയിലാണ് സേവനങ്ങള്‍ നല്‍കുന്നത്.