കൊച്ചി: കുറഞ്ഞ നിരക്കില്‍ ഇപ്പോള്‍ ഇത്തിഹാദില്‍ പറക്കാം. ടിക്കറ്റ് നിരക്കില്‍ 50 ശതമാനം കുറവുമായി ഇത്തിഹാദ് എയര്‍ലൈന്‍സ് രംഗത്ത്. ഇത്തിഹാദിന്റെ വാര്‍ഷിക സെയില്‍സ് ക്യാമ്പയിന്റെ ഭാഗമായാണ് ഈ ഓഫര്‍. 2017 ജൂലൈ വരെ ഈ ആനുകൂല്യത്തോടെ ലോകത്തെവിടേയും ഇക്കണോമി,ബിസിനസ് ക്ലാസുകളില്‍ ഈ ഓഫറിലൂടെ സഞ്ചരിക്കാം.

ആഗസ്റ്റ് 29നും സെപ്തംബര്‍ നാലിനുമിടയില്‍ ഇത്തിഹാദ് ഡോട്ട് കോം വഴിയോ ലോക്കല്‍ ട്രാവല്‍ ഏജന്റ് വഴിയോ ബുക്ക് ചെയ്യുന്നവര്‍ക്ക് ഏഴ് ദിവസത്തേക്കാണ് ഓഫര്‍ ലഭിക്കുക. യൂറോപ്പ്, ഏഷ്യ, മിഡില്‍ ഈസ്റ്റ്, ആഫ്രിക്ക, അമേരിക്ക എന്നീ ഭൂഖണ്ഡങ്ങളിലെ 45 പ്രമുഖ സ്ഥലങ്ങളിലേക്കാണ് ഇത്തിഹാദ് യാത്ര വാഗ്ദാനം നല്‍കുന്നത്.

എയര്‍ബെര്‍ലിന്‍, അലിറ്റാലിയ, എയര്‍ സെര്‍ബിയ, എയര്‍ സെയ്ച്ചെല്‍സ്, എത്തിഹാദ് റീജിയണല്‍, ജെറ്റ് എയര്‍വേയ്സ്, നിക്കി എന്നീ എയര്‍ലൈന്‍സുകളും ഇത്തിഹാദ് എയര്‍ലൈന്‍സിന് പുറമേ ഈ പദ്ധതിയിലുണ്ട്.

ആറ് ഭൂഖണ്ഡങ്ങളിലെ സുപ്രധാന നഗരങ്ങളെ ഉള്‍പ്പെടുത്തി അതാതു രാജ്യത്തെ എയര്‍ലൈന്‍ ശൃംഖലകളുമായി സഹകരിച്ചാണ് ഇത് നടപ്പിലാക്കുക.