ന്യൂഡല്‍ഹി: അഞ്ചാം ഘട്ട ഗോള്‍ഡ് ബോണ്ടിനുള്ള അപേക്ഷ സ്വീകരിക്കാന്‍ ആരംഭിച്ചു. ഒരു ഗ്രാമിന് തുല്യമായ മൂല്യമുള്ള ബോണ്ടിന് 3150 രൂപയാണ് വില. സ്വര്‍ണത്തിന്റെ ഉപയോഗം നിയന്ത്രിച്ച് ഇറക്കുമതി കുറയക്കാന്‍ ലക്ഷ്യമിട്ട് കേന്ദ്ര സര്‍ക്കാര്‍ ആരംഭിച്ച ഗോള്‍ഡ് ബോണ്ട് പദ്ധതിയില്‍ അഞ്ചാം ഘട്ടത്തിലെ ബോണ്ടുകള്‍ സെപ്റ്റംബര്‍ 23ന് വിതരണം ചെയ്യും.

റിസര്‍വ് ബാങ്കാണ് ഗോള്‍ഡ് ബോണ്ടിന്റെ വില തീരുമാനിക്കുന്നത്. ബുള്ള്യന്‍ ആന്‍ഡ് ജ്വല്ലേഴ്‌സ് അസോസിയേഷന്റെ കഴിഞ്ഞ ആഴ്ചയിലെ 999 പരിശുദ്ധിയുള്ള സ്വര്‍ണവിലയുടെ ശരാശരി അനുസരിച്ചാണ് ബോണ്ടിന്റെ വില നിശ്ചയിക്കുന്നത്.

നാലാം ഘട്ടത്തില്‍ ഒരു ഗ്രാമിന്റെ സ്വര്‍ണബോണ്ടിന് 3,119 രൂപയായിരുന്നു നിരക്ക്. 919 കോടി രൂപയാണ് സ്വര്‍ണ ബോണ്ടിലൂടെ നാലാം ഘട്ടത്തില്‍ സമാഹരിച്ചത്. കഴിഞ്ഞ ഒക്ടോബറില്‍ ആരംഭിച്ച സ്വര്‍ണബോണ്ട് പദ്ധതിയില്‍ ഇതുവരെ 4.9 ടണ്‍ സ്വര്‍ണത്തിന് അതേ മൂല്യമുള്ള നിക്ഷേപമാണ് നടന്നത്.

തിരഞ്ഞെടുക്കപ്പെട്ട പോസ്‌റ്റോഫീസുകള്‍, ബാങ്കുകള്‍,സ്റ്റോക്ക് ഹോള്‍ഡിംഗ് കോര്‍പ്പറേഷന്‍ ഓഫ് ഇന്ത്യ,സ്റ്റോക്ക് എക്‌സ്‌ചേഞ്ചുകള്‍ എന്നിവ വഴിയാണ് സ്വര്‍ണബോണ്ട് വാങ്ങാന്‍ കഴിയുക.