കൊച്ചി: കൊച്ചി ആസ്ഥാനമായുള്ള എയര്‍ഇന്ത്യ എക്‌സ്പ്രസിന് മികച്ച വളര്‍ച്ച. 2015-2016 സാമ്പത്തിക വര്‍ഷം എയര്‍ ഇന്ത്യ എക്‌സ്പ്രസിന്റെ ലാഭം 361.68 കോടി രൂപ. 2005ല്‍ പ്രവര്‍ത്തനമാരംഭിച്ചതിന് ശേഷം ആദ്യമായാണ് എയര്‍ഇന്ത്യ എക്‌സ്പ്രസ് ലാഭം നേടുന്നത്.

2014-2015ല്‍ എയര്‍ ഇന്ത്യ എക്‌സ്പ്രസിന് 61 കോടി രൂപയുടെ നഷ്ടം നേരിട്ടിരുന്നു. ശരാശരി യാത്രക്കാരുടെ എണ്ണം 81.4%ല്‍ നിന്നും 82.3 % ആയി. കഴിഞ്ഞ സാമ്പത്തിക വര്‍ഷം 2622 കോടി വരുമാനം നേടിയ എയര്‍ ഇന്ത്യ എക്‌സ്പ്രസ് ഇത്തവണ 2917.96 കോടി രൂപയാണ് നേടിയത്.

ഈ വര്‍ഷം ന്യൂഡല്‍ഹി-ദുബായ്, അബുദാബി സര്‍വീസുകള്‍ ആരംഭിച്ചിരുന്നു. വിമാനങ്ങളുടെ എണ്ണം കൂട്ടാതെയാണ് ഈ നേട്ടം എയര്‍ ഇന്ത്യ എക്‌സ്പ്രസ് സ്വന്തമാക്കിയത്.

വാരണസി-ഷാര്‍ജ എക്‌സ്പ്രസ് ആഴ്ചയില്‍ ഏഴ് ദിവസമാക്കാനൊരുങ്ങുകയാണ് കമ്പനി. ചണ്ഡീഗഢില്‍ നിന്ന് ആദ്യത്തെ രാജ്യാന്തര സര്‍വീസ് തുടങ്ങുന്ന കമ്പനിയാണ് എയര്‍ ഇന്ത്യ എക്‌സ്പ്രസ്. ഏഴ് ദിവസം ട്രിച്ചിയില്‍ നിന്നും ഷാര്‍ജയിലേക്ക് നേരിട്ട് സര്‍വീസ് നടത്താനും ഒരുങ്ങുന്നുണ്ട്.