കൊച്ചി: സംസ്ഥാനത്ത് സ്വര്‍ണ വില പവന് 80 രൂപ കുറഞ്ഞ് 23,400 ആയി. ഗ്രാമിന് 2,935 രൂപയായിരുന്നത് 10 രൂപ കുറഞ്ഞ് 2,925 രൂപ എന്ന നിരക്കിലാണ് വ്യാപാരം നടക്കുന്നത്.

കഴിഞ്ഞ ദിവസം സ്വര്‍ണത്തിന് പവന് 23,480 രൂപയായിരുന്നു. അന്താരാഷ്ട്ര വിപണിയില്‍ സ്വര്‍ണം ഔണ്‍സിന് 1,352 ഡോളര്‍ ആയിരുന്നത് 1,344 ഡോളറായി കുറഞ്ഞു. ആഗോള വിപണിയിലുണ്ടായ കുതിപ്പാണ് ആഭ്യന്തര വിപണിയില്‍ ദൃശ്യമായത്.2014 നവംബറില്‍ സ്വര്‍ണവില റെക്കോര്‍ഡ് ഭേദിച്ച് 24000 കടന്നിരുന്നു.

ചിങ്ങമാസം എത്തിയതോടെ കേരളത്തില്‍ വിവാഹ സീസണ്‍ ആരംഭിച്ചു. ഉത്സവകാലവും വിവാഹസീസണും കാരണം സ്വര്‍ണവില ഉയരുമെന്നാണ് വിപണിയിലെ വിദഗ്ദ്ധര്‍ പറയുന്നത്. വരുംദിവസങ്ങളില്‍ സ്വര്‍ണവില കൂടിയേക്കും.

ഓണക്കാലം ആരംഭിച്ചതോടെ കേരളത്തിലെ ജ്വല്ലറികളില്‍ നല്ല തിരക്കാണ് അനുഭവപ്പെടുന്നത്. ഡിസ്‌കൗണ്ടുകളും ഓഫറുകളും നല്‍കി ഉപഭോക്താക്കളെ ആഭരണശാലകളെല്ലാം തന്നെ ആകര്‍ഷിക്കുന്നുണ്ട്.