പ്രവാസികള്‍ക്ക് എയര്‍ ഇന്ത്യ എക്‌സ്പ്രസിന്റെ ഓണസമ്മാനം

എക്‌സ്പ്രസ് നിരക്ക് കുറച്ചു

പുതിയ നിരക്കനുസരിച്ച് അബുദാബി, കോഴിക്കോട് റൂട്ടില്‍ 1260 രൂപയുടെ കുറവാണുള്ളത്. നേരത്തെ 7830 രൂപയായിരുന്നത് (435 ദിര്‍ഹം) പുതിയ നിരക്കനുസരിച്ച് 6570 രൂപയായി (365 ദിര്‍ഹം) കുറയുമെന്ന് എയര്‍ ഇന്ത്യ എക്സ്പ്രസ് ട്രാവല്‍ കണ്‍സള്‍ട്ടന്റ് അബ്ദുള്‍ സാലിഹ് അറിയിച്ചു.

നിരക്കുകള്‍

കൊച്ചിയിലേക്ക് 7470 രൂപയും (415 ദിര്‍ഹം) തിരുവനന്തപുരത്തേയ്ക്ക് 9090 രൂപയും (505 ദിര്‍ഹം) ദില്ലിയിലേക്ക് 6516 രൂപയും (362 ദിര്‍ഹം) ,അല്‍ ഐന്‍- കോഴിക്കോട് റൂട്ടില്‍ 7650 രൂപയും (425 ദിര്‍ഹം) മാംഗളൂരിലേക്ക് 6660 രൂപയുമാണ് (370 ദിര്‍ഹം) പുതുക്കിയ നിരക്കുകള്‍.

14 മുതല്‍ നിരക്കിളവുകള്‍

തിരുവോണ ദിവസമായ സെപ്തംബര്‍ 14 മുതലാണ് പുതിയ നിരക്കുകള്‍ പ്രാബല്യത്തില്‍ വരിക.

ടെര്‍മിനലില്‍ മാറ്റം

എയര്‍ ഇന്ത്യ എക്സ്പ്രസ് ഇനി മുതല്‍ അബുദാബി അന്താരാഷ്ട്ര വിമാനത്താവളത്തില്‍ ടെര്‍മിനല്‍ ഒന്നിനു പകരം ടെര്‍മിനല്‍ 1എ ല്‍ നിന്നാണ് പുറപ്പെടുകയെന്നും കമ്പനി അറിയിച്ചു.

ലാഭം നേടി എയര്‍ഇന്ത്യ എക്‌സ്പ്രസ്

2015-2016 സാമ്പത്തിക വര്‍ഷം എയര്‍ ഇന്ത്യ എക്സ്പ്രസിന്റെ ലാഭം 361.68 കോടി രൂപയായി വര്‍ധിച്ചിരുന്നു. 2005ല്‍ പ്രവര്‍ത്തനമാരംഭിച്ചതിന് ശേഷം ആദ്യമായാണ് എയര്‍ഇന്ത്യ എക്സ്പ്രസ് ലാഭം നേടുന്നത്.

പുതിയ സര്‍വീസുകള്‍

വാരണസി-ഷാര്‍ജ എക്സ്പ്രസ് ആഴ്ചയില്‍ ഏഴ് ദിവസമാക്കാനൊരുങ്ങുകയാണ് കമ്പനി. ചണ്ഡീഗഢില്‍ നിന്ന് ആദ്യത്തെ രാജ്യാന്തര സര്‍വീസ് തുടങ്ങുന്ന കമ്പനിയാണ് എയര്‍ ഇന്ത്യ എക്സ്പ്രസ്. ഏഴ് ദിവസം ട്രിച്ചിയില്‍ നിന്നും ഷാര്‍ജയിലേക്ക് നേരിട്ട് സര്‍വീസ് നടത്താനും ഒരുങ്ങുന്നുണ്ട്.