ബെംഗളൂരു: ലോകത്തെ മുന്‍നിര സ്പോര്‍ട്സ് ബ്രാന്‍ഡുകളില്‍ ഒന്നായ നൈക്കി ഇന്ത്യയിലെ ബിസിനസ് കുറയ്ക്കുന്നു. നഷ്ടം നികത്തുകയെന്ന ലക്ഷ്യത്തോടെ രാജ്യത്തെ 35 ശതമാനം സ്റ്റോറുകള്‍ നൈക്കി അടച്ചുപൂട്ടി. ബാറ്റ് സ്പോണ്‍സറിങും നൈക്കി അവസാനിപ്പിക്കും.

2014-15 കാലയളവില്‍ നൈക്കി ഇന്ത്യയുടെ മൊത്തനഷ്ടം ഏതാണ്ട് 541 കോടി വരുമെന്നാണ് റിപ്പോര്‍ട്ടുകള്‍. ഇതേകാലയളവില്‍ ജര്‍മ്മന്‍ സ്‌പോര്‍ട്‌സ് ബ്രാന്‍ഡ് ആയ പ്യൂമ ലാഭമുണ്ടാക്കി. വിപണിയിലെ നൈക്കിയുടെ പ്രധാന എതിരാളികളായ അഡിഡാസിന്റെ മൊത്തനഷ്ടം 68 കോടിയും റീബോക്കിന്റേത് 2,198 കോടിയുമാണ്.

മുന്‍നിര ഇന്ത്യന്‍ ക്രിക്കറ്റര്‍മാര്‍ക്ക് ബാറ്റ് സ്പോണ്‍സര്‍ ചെയ്യുന്നത് അവസാനിപ്പിക്കാനും നെക്കി തയ്യാറെടുക്കുന്നുണ്ട്. ഇന്ത്യന്‍ ക്രിക്കറ്റ് ടീമിന്റെ കിറ്റിനായി പ്രതിവര്‍ഷം 60 കോടി രൂപയാണ് നൈക്കി ചെലവിടുന്നത്. ഒരു താരത്തിന്റെ ബാറ്റ് സ്പോണ്‍സര്‍ ചെയ്യാന്‍ 25 ലക്ഷം മുതല്‍ എട്ട് കോടി രൂപ വരെയാണ് കമ്പനികള്‍ സാധാരണ ചെലവിടാറുള്ളത്.

അക്സര്‍ പട്ടേല്‍, അജിങ്ക്യ രഹാനെ, ആര്‍ അശ്വിന്‍, രവീന്ദ്ര ജഡേജ, പാര്‍ത്ഥിപ് പട്ടേല്‍ തുടങ്ങിയ ഇന്ത്യന്‍ താരങ്ങള്‍ക്ക് ബാറ്റ് സ്പോണ്‍സര്‍ ചെയ്യുന്നത് നൈക്കിയാണ്. നഷ്ടം നികത്താന്‍ ഇന്ത്യയിലെ പാര്‍ട്ട്ണര്‍മാരുടെ എണ്ണം കുറക്കാനും നൈക്കി ആലോചിക്കുന്നുണ്ട്.