ബെംഗളൂരു: വലിയ ഉള്ളിയുടെ വില കൂപ്പുകുത്തിയതോടെ കര്‍ഷകര്‍ പ്രതിസന്ധിയില്‍. ക്വിന്റലിന് 300 മുതല്‍ 600 രൂപ വരെ നിരക്കിലാണ് വ്യാപാരികള്‍ കര്‍ഷകരില്‍നിന്നു സബോള എടുക്കുന്നത്.

കഴിഞ്ഞ മാസം വരെ ക്വിന്റലിന് 1,200 മുതല്‍ 1,500 രൂപ വരെ കര്‍ഷകര്‍ ലഭിച്ചിരുന്ന സ്ഥാനത്താണിത്. കഴിഞ്ഞ വര്‍ഷം 100 രൂപ വരെ കിലോഗ്രാമിന് വില വര്‍ധിച്ച ഉള്ളിക്ക് ഇത്തവണ കിലോഗ്രാമിന് 1-1.30 രൂപ വരെയാണ് കഴിഞ്ഞ മാസം ലഭിച്ചത്.

ഡിമാന്‍ഡ് കുറഞ്ഞെങ്കിലും വിപണിയില്‍ ഉള്ളി സുലഭമാണ്. ഗുജറാത്തിലും മധ്യപ്രദേശിലും ഉല്‍പാദനം വര്‍ധിച്ചതാണ് ഇത്തവണ ഉള്ളിക്കര്‍ഷകരെ ദുരിതത്തിലാക്കിയത്. ഉരുളക്കിഴങ്ങ് കര്‍ഷകരും സമാനമായ പ്രതിസന്ധി നേരിടുന്നുണ്ട്. ക്വിന്റലിന് 2,200 രൂപ വരെ ലഭിച്ചിരുന്ന സ്ഥാനത്ത് ഇപ്പോള്‍ 1,400- 1,500 രൂപയാണ് ലഭിക്കുന്നത്.

വിലയിടിവില്‍ പ്രതിഷേധിച്ചു ബലാഗവിയിലെ കര്‍ഷകര്‍ എപിഎംസി യാര്‍ഡില്‍ പ്രതിഷേധം നടത്തി. പ്രതിവാരം 150 ലോറി സബോളയാണ് എപിഎംസി യാര്‍ഡിലെത്തുന്നത്. വാങ്ങാന്‍ ആളുകള്‍ കുറവായതോടെയാണു വിലയിടിക്കാന്‍ വ്യാപാരികള്‍ നിര്‍ബന്ധിതരായത്. കാവേരി പ്രക്ഷോഭത്തെത്തുടര്‍ന്ന് തമിഴ്‌നാട്ടിലെ വ്യാപാരികള്‍ കര്‍ണാടകയില്‍നിന്നുള്ള ലോഡ് വാങ്ങാതെ വന്നതും വിലയിടിവിനു കാരണമായി.