ബെംഗളൂരു: നിക്ഷേപകര്‍ക്ക് ഐടി രംഗത്ത് നിന്നും ഒരു നല്ല വാര്‍ത്ത. പ്രമുഖ ഐടി കമ്പനിയായ ടിസിഎസിന് ലാഭം. സെപ്റ്റംബര്‍ പാദലാഭം മുന്‍വര്‍ഷത്തേക്കാള്‍ 8.2% ഉയര്‍ന്നു.

ജൂലൈ-സെപ്റ്റംബര്‍ കാലയളവില്‍ 6586 കോടി രൂപയുടെ ലാഭമാണ് ടിസിഎസ് നേടിയത്. മൊത്തം വിറ്റുവരവ് 8% ഉയര്‍ന്ന് 29284 കോടി രൂപയായി.

ആകെ 3.71 ലക്ഷം ജീവനക്കാരാണ് ടിസിഎസില്‍ ജോലി ചെയ്യുന്നത്. 22665 പേരെയാണ് ടിസിഎസ് പുതിയതായി നിയമിച്ചിട്ടുള്ളത്. ഓഹരിക്ക് 6.5 രൂപ നിരക്കിലാണ് കമ്പനി ലാഭം നല്‍കാന്‍ തീരുമാനിച്ചിരിക്കുന്നത്. ഇന്ത്യയിലെ ക്യാമ്പസ് റിക്രൂട്ട്‌മെന്റുകളിലും യുവാക്കളുടെ പ്രിയപ്പെട്ട കമ്പനിയാണ് ടിസിഎസ്.

സാമ്പത്തിക രംഗത്തെ അനിശ്ചിതത്വവും ഇന്ത്യയിലും ലാറ്റിന്‍ അമേരിക്കയിലുമുണ്ടായ വിപണിയിലെ ചാഞ്ചാട്ടവുമെല്ലാം ബിസിനസിനെ ബാധിച്ചുവെങ്കിലും മികച്ച ലാഭം നേടാനായതായി ടിസിഎസ് മേധാവി എന്‍ ചന്ദ്രശേഖരന്‍ അറിയിച്ചു.