കൊച്ചി: വിമാനയാത്രയ്ക്കുള്ള പണം തികഞ്ഞില്ലെങ്കിലോ? ക്രഡിറ്റ് കാര്‍ഡില്‍ ഫോണും ലാപ്‌ടോപ്പും വാങ്ങുന്നത്‌പോലെ വിമാനടിക്കറ്റ് പണം തവണകളായി അടയ്ക്കാന്‍ കഴിഞ്ഞെങ്കിലോ എന്ന് ആലോചിച്ചിട്ടില്ലേ. എന്നാലിനി വൈകണ്ട, മുന്‍നിര വിമാനക്കമ്പനിയായ എയര്‍ അറേബ്യ ഇന്ത്യന്‍ യാത്രക്കാര്‍ക്കായി ഇഎംഐ രീതിയില്‍ പണം നല്‍കാനുള്ള സൗകര്യം ഏര്‍പ്പെടുത്തി.

ഐസിഐസിഐ ബാങ്ക്, ആക്‌സിസ് ബാങ്ക്, കോട്ടക് മഹീന്ദ്രാ ബാങ്ക്, ഇന്‍ഡസ് ഇന്‍ഡ് ബാങ്ക്, എച്ച്എസ്ബിസി, എസ്ബിഐ, എച്ച്ഡിഎഫ്‌സി ബാങ്ക്, സെന്‍ട്രല്‍ ബാങ്ക് ഓഫ് ഇന്ത്യ എന്നീ ബാങ്കുകളുടെ ക്രെഡിറ്റ് കാര്‍ഡുകള്‍ ഉള്ളവര്‍ക്കാണു തവണകളായി പണമടയ്ക്കുന്ന രീതി പ്രയോജനപ്പെടുത്താന്‍ കഴിയുന്നത്.

ഷാര്‍ജ ആസ്ഥാനമായുള്ള എയര്‍ലൈന്‍ കമ്പനിയായ എയര്‍ അറേബ്യ ഏറ്റവും മികച്ച 50 ഗ്ലോബല്‍ എയര്‍ലൈനുകളുടെ ലിസ്റ്റില്‍ ഇടംപിടിച്ചിരുന്നു.