ബെംഗളൂരു:ദീപാവലി വിപണി സ്വന്തമാക്കാനുള്ള അവസാന മണിക്കൂര്‍ തന്ത്രപ്പാടിലാണ് ഇ-കൊമേഴ്സ് കമ്പനികള്‍. ഏറ്റവും മികച്ച ഓഫറുകള്‍ നല്‍കുന്നതിനായുള്ള മത്സരത്തിലാണ് ആമസോണും ഫ്‌ളിപ്കാര്‍ട്ടും സ്നാപ് ഡീലും.

22,999 രൂപ വിലയുള്ള ആന്‍ഡ്രോയ്ഡ് 6.0 മാര്‍ഷ്മാലോയില്‍ പ്രവര്‍ത്തിക്കുന്ന ലീകോയുടെ ലീ മാക്സ് 2 വിന്റെ 32 ജിബി 17,999 രൂപയ്ക്കാണ് സ്നാപ്ഡീല്‍ വഴി ലഭ്യമാകുന്നത്.

ഐഫോണ്‍ 7, ഐഫോണ്‍ 7 പ്ലസ് എന്നീ മോഡലുകള്‍ക്ക് ആകര്‍ഷകമായ ഓഫറുകള്‍ നല്‍കിയാണ് ഫ്‌ളിപ്കാര്‍ട്ട് മത്സരത്തിനെത്തിയത്്. 60000 രൂപയ്ക്ക് മുകളില്‍ വിലയുള്ള ഈ ഫോണുകള്‍ക്ക് സിറ്റിബാങ്ക് ക്രഡിറ്റ് കാര്‍ഡ് ഉപയോഗിച്ച് വാങ്ങുമ്പോള്‍ 7000 രൂപ വരെ കിഴിവാണ് ഫ്‌ളിപ്കാര്‍ട് നല്‍കുന്നത്. മൈക്രോസോഫ്റ്റിന്റെ സര്‍ഫസ് പ്രോ 4 മോഡല്‍ 48,890 രൂപയ്ക്കും ലഭ്യമാകും.

15000 രൂപയോളം വരുന്ന ഗിഫ്റ്റ്കാര്‍ഡുകളാണ് ആമസോണ്‍ ദീപാവലി ഓഫറായി ഉപഭോക്താക്കള്‍ക്ക് നല്‍കുന്നത്. എസ്ബിഐ, സിറ്റിബാങ്ക് തുടങ്ങിയ ബാങ്കുകളുമായി ചേര്‍ന്ന് ആമസോണും ഫ്ളിപ്കാര്‍ട്ടും പത്തു മുതല്‍ പതിനഞ്ച് ശതമാനം വരെ ഡിസ്‌കൗണ്ട് ഓഫറുകള്‍ നല്‍കുന്നുണ്ട്.