കൊച്ചി: നെടുമ്പാശേരി വിമാനത്താവളത്തില്‍നിന്നും ഫ്‌ളൈറ്റുകള്‍ വര്‍ധിച്ചു. പ്രതിവാര ഫ്‌ളൈറ്റുകളുടെ
എണ്ണം 1142ല്‍നിന്നും 1280 ആയാണ് വര്‍ധിച്ചത്. ഡിസംബര്‍, ജനുവരി മാസങ്ങളിലെ യാത്രക്കാരുടെയും ടൂറിസ്റ്റ് സീസണും കണക്കിലെടുത്താണ് വിമാനക്കമ്പനികള്‍ സര്‍വീസുകള്‍ വര്‍ധിപ്പിച്ചത്. ക്രിസ്മസ്, ന്യൂ ഇയര്‍ കാലത്ത് യാത്രക്കാരുടെ തിരക്ക് കൂടാറുണ്ട്.

ആഭ്യന്തരതലത്തില്‍ എയര്‍ വേഗാസും ഇന്‍ഡിഗോയും എയര്‍ ഏഷ്യയും സര്‍വീസുകള്‍ വര്‍ധിപ്പിച്ചു. അന്താരാഷ്ട്രതലത്തില്‍ കുവൈറ്റ് എയര്‍വേസും മലിന്‍ഡോ എയറും സൗദി അറേബ്യന്‍ എയര്‍ലൈന്‍സും സര്‍വീസുകള്‍ വര്‍ധിപ്പിച്ചു.

ആഴ്ചയില്‍ 14 സര്‍വീസുകളുണ്ടായിരുന്ന കുവൈറ്റ് എയര്‍വേസ് 24 സര്‍വീസുകളാക്കി. കൊച്ചി-കുവൈറ്റ് സെക്ടറിലാണ് എല്ലാ സര്‍വീസുകളും. മലിന്‍ഡോയുടെ സര്‍വീസുകള്‍ 24 എണ്ണമായി. എല്ലാ ഫ്‌ളൈറ്റുകളും കൊച്ചി-കോലാലംപുര്‍ സെക്ടറുകളിലാണ്. ആഭ്യന്തര സെക്ടറില്‍ എയര്‍ ഏഷ്യ സര്‍വീസ് 28ല്‍നിന്നും 70 ആക്കി വര്‍ധിപ്പിച്ചു. ബംഗളൂരു, ഹൈദരാബാദ് എന്നിവിടങ്ങളിലേക്കുള്ള ഫ്‌ളൈറ്റുകളുടെ എണ്ണമാണ് വര്‍ധിപ്പിച്ചത്.

ഇന്‍ഡിഗോ 210 സര്‍വീസുകള്‍ 224 ആയി വര്‍ധിപ്പിച്ചു. എയര്‍ പെഗാസസ് 14 ഫ്‌ളൈറ്റുകള്‍ 28 ആക്കി.സൗദി എയര്‍ലൈന്‍സ് കൊച്ചി-ജിദ്ദ സെക്ടറിലെ ഫ്‌ളൈറ്റുകളുടെ എണ്ണം 28ല്‍നിന്ന് 32 ആക്കി ഉയര്‍ത്തി.