ബെംഗളൂരു: വെള്ളിയാഴ്ച രാത്രി മുതല്‍ പഴയ നോട്ടുകള്‍ രാജ്യത്ത് സ്വീകരിക്കില്ല . 500,1000 രൂപ നോട്ടുകള്‍ പിന്‍വലിച്ചപ്പോള്‍ നല്‍കിയ ഇളവുകളാണ് ഇന്ന് അര്‍ധരാത്രിയോടെ അവസാനിക്കുക.

ആശുപത്രി, റെയില്‍വേ സ്റ്റേഷനുകള്‍, ബസുകള്‍ തുടങ്ങിയ സ്ഥലങ്ങളില്‍ പഴയ നോട്ട് സ്വീകരിക്കാനുള്ള സമയമാണ് വെള്ളിയാഴ്ച അര്‍ധരാത്രി അവസാനിക്കുന്നത്.

ആദായനികുതി വകുപ്പ് കഴിഞ്ഞ ദിവസം ആരംഭിച്ച റെയ്ഡ് ഇന്നും തുടരും. ജ്വല്ലറികള്‍ ഉള്‍പ്പടെയുള്ള സ്ഥലങ്ങളില്‍ പഴയ നോട്ട് സ്വീകരിക്കുന്നുണ്ടോ എന്ന് പരിശോധിക്കാനായിരുന്നു റെയ്ഡ്. ഇന്നലെ രാജ്യത്തെ പ്രധാനനഗരങ്ങളില്‍ മാത്രമായിരുന്നു റെയ്ഡ്. ഇന്ന് ഇത് വ്യാപിപ്പിക്കും.

ബാങ്കുകളില്‍ ഇന്നും പ്രത്യേക കൗണ്ടറുകള്‍ പ്രവര്‍ത്തിക്കും. തിരിച്ചറിയല്‍ കാര്‍ഡിന്റെ പകര്‍പ്പിനൊപ്പം പ്രത്യേക അപേക്ഷ പൂരിപ്പിച്ച് നല്‍കിയാല്‍ 4000 രൂപ വരെയുള്ള നോട്ടുകള്‍ മാറ്റി വാങ്ങാം. ചെക്ക് വഴി പതിനായിരം രൂപയും മാറ്റിയെടുക്കാം. അതേസമയം എത്ര വലിയ തുകയും അക്കൗണ്ടില്‍ നിക്ഷേപിക്കുന്നതിന് തടസ്സമുണ്ടാകില്ല.